Xəbər verdiyimiz kimi, qondarma Qarabağın keçmiş "müdafiə naziri" kimi təqdim olunan Samvel Babayan Azərbaycandan ermənilər üçün muxtar vilayət istəyir. Onun fikrincə, əgər Azərbaycan ermənilərə muxtariyyət statusu verməyə razılaşmasa onlar Qarabağa qayıtmamalıdırlar.
Samvel Babayan bu açıqlaması ilə Azərbaycan tərəfinə şərt qoyaraq, şantaj predmetinə əl atmağa çalışır. Bununla da həm təxribat, həm də Qarabağ ermənilərinin arasında panika yaratmağa çalışır.
Məsələ bağlı Ednews – a danışan politoloq Bütöv Azərbaycan Xalq Cəbhəsi Partiyası (BAXCP) sədrinin müavini, Niyaməddin Orduxanlı açıqlamanı gülünc və absurd adlandıraraq, Samvel Babayanın da Azərbaycan təcridxanalarının gözlədiyini söyləyib:
“Samvel Babayanlar və digər hərbi cinayət törədmiş, 30 il Azərbaycana qarşı ən ağır, qatı cinayətlər törədmiş insanların muxtariyyət tələb etmələri çox gülünc və absurddur. Onların yeri Azərbaycanın təcridxanalarıdır. Çox az müddətdə özlərini “prezident” adlandıran 3 “təlxək” kimi həmin Babayanları da təcridxanalar gözləyir. Onlar ən ağır cinayətləri törədiblər, amansız qətllər icra ediblər, günahsız mülki insanları – qadın, uşaq, ahıl demədən qətlə yetiriblər. Onlar qətiyyən düşünməsinlər ki, Ermənistana qaçıb gizlənməklə, canlarını qurtarmış olacaqlar. Hansı muxtariyyətdən söhbət gedə bilər ki? Azərbaycan öz ərazi suverenliyini tam bərpa edib və bundan sonra kimsə bu cür iddialara düşəcəksə, qanun qarşısında cavab verməli olacaq. Dəmir yumruq həmin an onlarını başını əzəcək. Azərbaycan öz suverenliyini qoruyur və bundan sonra da qoruyacaq”.
Müsahibənin davamında o, Azərbaycana qarşı cinayət törətmiş şəxslərin sülh sazişində qeyd ediləcəyi fikrini də vurğulayıb:
“Bu cür absurd iddialara düşmək qətiyyən yol verilməzdir. Ali Baş Komandan dəfələrlə vurğulayıb ki, hansısa bir statusdan söhbət belə gedə bilməz. Azərbaycan ərazisində yaşayan bütün etnik xalqlar ölkə konstitusiyasıyla eyni hüquqa malikdir. İrqindən, etnikindən, milliyətindən fərqli olmayaraq, hər bir kəs Azərbaycan Qanunvericiliyinə uyğun bütün hüquqları istifadə etməkdə azaddırlar. Ermənilər hansı xalqlardan üstündür ki, biz onlara muxtariyyət verməliyik? Ona görə bu cür açıqlamaların heç bir əsası yoxdur. Qeyd etdiyim kimi həmin şəxsləri qanun qarşısında cavab vermək gözləyir. Azərbaycan Ermənistanla sülh sazişi imzalasaq belə, yenə də həmin cinayət törədmiş şəxslər hökümətimiz tərəfindən tələb olunacaq, ələxsus sülh sazişində də bir növ Azərbaycana təzminat kimi yer alacaq”.
Əkbər Novruz