Ednews tanınmış zərgər Xəlil Rəhimzadə ilə müsahibəni təqdim edir. 

Xəlil Rəhimzadə 11 yaşından zərgərlik sənətini öyrənməyə başlayıb. Atası zərgər olduğuna görə dərsdən çıxıb onun yanına gedib, beləliklə də bu sənətə yiyələnib. 

- Xəlil bəy zərgərliyə marağınız necə yarandı?

- Zərgərlik bizə dədə-babadan gələn sənətdir. Atamdan öyrənmişəm. 11 yaşım olandan atamın yanına, emalatxanaya gedirdim və orada öyrənirdim. Gümüşdən başlamışam öyrənməyə. 

- Sənətinizi necə inkişaf etdirdiniz?

- Əvvəlcə zinət əşyalarını işləyirdim. 15 ildən sonra suvenirlər işləməyə başladım. Dövlət, ofis işçiləri üçün suvenirlər işləyirdim. Gəldik çatdıq 2020-ci ilə... Karantin olanda, hər yer dayananda məndə depressiv vəziyyət yarandı. Sosial olmağı düşünürdüm. Bu işin sosial tərəfi, həmçinin xeyriyyəçilik ilə məşğul olmaq lazımdır. 

- Bəs bunun üçün hansı addımları atdınız?

- Lilex MMC açdım. Daha sonra onun milli brendini qurdum. Ardınca dəstək üçün Cənab Prezident İlham Əliyevə yazılı müraciət etdim. Məni "AzerGold" QSC-ə və Zərgərlər Asossasiyasına yönləndirdilər. Ondan sonra layihələrim başladı. 

- MMC-ni necə qurdunuz, işçilər cəlb etdiniz?

- Ətrafımda işçilər, komandam var idi. MMC-ni qurmaq üçün hüquqşünas cəlb etdik və sonra fəaliyyətə başladıq. Amma mənim üçün maraqlı olan sosial tərəfi və ictimai birliyin yaradılması idi. İndi onun üzərində çalışırıq. Biz həmçinin akademiya da açmışıq. Mən ustayam, öyrədirəm. Akademiyanı xeyriyyəçilik məqsədi ilə fiziki məhdudlu şəxslər, kimsəsiz uşaqlar, qazilər, minada zərər çəkənlər üçün istifadə edəcəyik. Onları bu sahəyə cəlb edib, öyrədəcəyik. İşləyib sənətkar olacaqlar. İşlə də təmin ediləcəklər. Özləri istəsələr müstəqil brend yaratmaqlarına yardımcı olacağıq.

- Bu sahə ilə bağlı müraciət edənlər var?

- Bəli var. Əlillər Cəmiyyətinə müraciət etmişik. 30 nəfər istəyən var artıq. Bu layihəni təzəlikcə başlamışıq. Kimsəsiz uşaqlarla hələ ki, görüş keçirməmişik. Yaxın günlərdə onların asossasiyaları ilə də görüşəcəyik.

- Azərbaycanda bu sahədə boşluq var.

- Çox böyük boşluq var. Hamısı bu sənətə sağmal inək kimi yanaşır. Heç kim fikirləşmir ki, indi nəsə edim, 10 il sonra mən olmayanda gələcək nəsil nəticəsini görsün. Qazanmağı düşünürlər. Ona görə də çox böyük problemlər yaranır.

- Zərgərlik sənətinə gənclərin marağı necədir?

- Bu sənət yaradıcı sənətdir, gənclərin də marağı var. Sadəcə olaraq irəlidə, gözdə olanlar bu sənətin spekulyasiya ilə məşğul olanlardı. Sənətkarların özləri deyil. Ona biznes də demək olmaz. Biznesin çox aşağı mərtəbələridir.

- Bəs zərgərliyi öyrənməyin nə kimi çətinlikləri var?

- Biz tələbə götürəndə, ona 1 ay vaxt veririk ki, ondan zərgər olacaq ya yox. Bu sahədə bacarıqlı olmaq üçün beyin həm texniki tərəfə, həm də humanitar tərəfə çalışmalıdır. Çünki bu sahədə həndəsə də var, rəssamlıq da. Mən istəyirəm ki, müəllim kimi gəncləri yetişdirim. Çünki zərgərlikdə gənc müəllim yoxdu.

- Beynəlxalq müstəvidə zərgərlik hansı səviyyədədir?

- Beynəlxalq müstəvidə Azərbaycan çox geriləyir. Qonşu ölkələrdən çox geri qalmışıq. Zərgərlik bu regionda həmişə birinci olub. Hal-hazırda ən axırıncılardandır. Bizdə qızıl çıxır. Cənab prezidentimiz də deyib ki, qızılı emal edin ölkəyə valyuta gətirin. Bizdə isə əksinədir. Kobud desək alverçilərin siyasətidir. Ölkəyə idxal etməklə satırlar. Məncə ixrac etmək daha çox qazanc gətirər ölkəmizə.

- Layihələriniz var?

- Layihələrimiz var, təsdiq olmasını gözləyirik. Peşə Təhsil Agentliyi mənə layihə verib. Fransaya tələbə aparacam. Orda turnir keçiriləcək. Azərbaycan belə bir turnirə ilk dəfə qatılacaq. Ona da mən rəhbərlik edirəm.

- Turnirin adı nədir?

- “World skills” mənası dünya bacarıqları. 65 peşədən ibarət bir turnir olacaq. Azərbaycan 7 peşə ilə iştirakçıdır. Bunlardan biri də zərgərlik peşəsidir.

İşlərinizdə uğurlar arzu edirəm, qalib olmağınız diləyi ilə..

- Çox sağ olun.

Söhbətləşdi: Oğuz Ayvaz