22 iyun tarixində “RİA Novosti”-də Azərbaycana qarşı təxribat xarakterli bir xəbər yayımlanıb. Xəbərdə Kırım Nəqliyyat Agentliyinə istinadən qeyd edilir ki, guya Azərbaycan tərəfinin təşəbbüsü ilə ötən aydan başlayaraq Bakı-Krım avtobus reysi açılıb.
Qeyd edək ki, məsələnin təxribati xarakteri ondan ibarətdir ki, Azərbaycan Kırımı Ukraynanın tərkib hissəsi kimi tanıyır və onu işğal edilmiş ərazi hesab edir.
Məsələyə münasibət bildirən Nəqliyyat və Yüksək Texnologiyalar Nazirliyi bu xəbəri təkzib edib. Və belə bir planın mövcud olmadığını açıqlayıb.
Eyni zamanda "Atlas" araşdırmalar mərkəzinin rəhbəri, politoloq Elxan Şahinoğlu “RİA Novosti”-də çıxan xəbərin adi jurnalist xətası olmadığını və burada təxribata yer verildiyini qeyd edib.
O, bildirib ki, Azərbaycan Ukraynanın ərazi bütövlüyünü dəstəkləyir və Krımı Ukrayna ərazisi sayır.
Kremlin məqsədi aydındır, bu cür saxta xəbərlər vasitəsilə Azərbaycan tərəfinin nəbzini yoxlayır.
Anlamırlar ki, Dağlıq Qarabağ kimi problemimiz var, başqa separatçılarla əməkdaşlıq edə bilmərik.
Buna baxmayaraq, Rusiya Krım mövzusundan əl çəkən deyil və hər dəfə bizi yeni oyuna qatmaq istəyəcək. Ehtiyatlı olmalıyıq.
Təsadüfi deyil ki, Rusiya səfirliyi Bakıda təşkil etdiyi “Rusiya günü” tədbirində də təxribat həyata keçirərək “Krım bizimdir” kimi şəkillər yaydılar.