DİN-in Baş Mütəşəkkil Cinayətkarlıqla Mübarizə İdarəsinin rəisi, polis general-mayoru Seyfulla Əzimov Daxili işlər nazirinin birinci müavini vəzifəsinə təyin edilib.
Eurasia Diary xəbər verir ki, bu barədə Prezident İlham Əliyev sərəncam imzalayıb.
Qeyd edək ki, 1970-ci il təvəllüdlü Seyfulla Əzimov Azərbaycan Polis Akademiyasının yetirməsidir. Daha öncə Nəsimi Rayon 22-ci Polis Bölməsinin rəisi, Nərimanov Rayon Polis İdarəsinin rəis müavini, Quba Rayon Polis Şöbəsinin rəisi vəzifələrində işləyib.
Əzimov yeni vəzifəsinə qədər Baş Mütəşəkkil Cinayətkarlığa Qarşı Mübarizə İdarəsinin rəisi olub. O, bu vəzifəyə 2014-cü ildə sabiq Daxili İşlər naziri Ramil Usubovun imzaladığı əmrlə təyin olunub. “Bandotdel”ədək Quba Rayon Polis Şöbəsinin rəisi olan Əzimov, həmin vaxt yeni vəzifədə Bakı Şəhər Baş Polis İdarəsinə rəis təyin olunan Mirqafar Seyidovu əvəzləyib.
Seyfulla Əzimovun adı qubalılara daha çox tanış olsa da, o, ADNA-da 2009-cu ildə baş verən terror hadisəsindən sonra gündəmə gəlib. Əzimov həmin vaxt Nəsimi Rayon 22-ci polis bölməsinin rəisi olub. Hadisəni eşidən kimi ADNA-ya gələn ilk səlahiyyətli şəxslərdən olub. Onun akademiyada avtomatla yoxlama apardığını əks etdirən kadrlar da var.
Qısa müddətdən sonra Əzimov Ramil Usubovun əmri ilə Nərimanov Rayon Polis İdarəsinin rəis müavini təyin olunur. Bir müddətdən sonra 2011-ci ildə S. Əzimov müavinlikdən rəis vəzifəsinə qalxır. O, Quba Rayon Polis Şöbəsinin rəisi vəzifəsinə təyinat alır. Üç ildən sonra isə ona daha böyük post - Baş Mütəşəkkil Cinayətkarlığa Qarşı Mübarizə İdarəsi etibar olunur. Beş il “Bandotdel”in rəisi olan Seyfulla Əzimov Daxili İşlər nazirinin birinci müavini vəzifəsinədək yüksəlir.
