Xəbər verdiyimiz kimi,  bu günlərdə ATƏT Parlament Assambleyasının Siyasi və təhlükəsizlik məsələləri üzrə komitəsi Rusiyanı qondarma Abxaziya və Cənubi Osetiya "respublika"larını tanımaq haqqında qərarını geri çəkməyə çağırıb.

 

Sənəddə Rusiya Gürcüstanın bir hissəsini işğal etməkdə və Şimali Qafqazın qondarma qurumlarında insan haqlarını pozmaqda təqsirləndirilir.

 

Təbii ki, Şimal qonşumuzun rəsmiləri bu haqda deyilənləri həmişəki kimi qulaq ardına vurur. Rusiya Federasiya Şurasının Beynəlxalq əlaqələr üzrə komitə sədrinin birinci müavini Vladimir Cabarov Kremlin Abxaziya və Cənubi Osetiyanın müstəqilliklərini tanımaq barədə siyasətindən vaz keçməyəcəyini və bu məsələnin toxunulmaz qalacağını söyləyib. 

 

Sovet dövründən bəri peşəkar diplomat kimi tanınmış, ermənipərəst “Regnum” agentliyinin siyasi analitiki Mixail Demurin isə daha irəli gedərək Rusiya dövlətini nəinki ATƏT-in tövsiyə və  göstərişlərini dinləməməyə, bu Avropa təşkilatından birdəfəlik çıxmağa çağırıb. Rusiyalı analitik bu arada Azərbaycana, ölkəmizin ərazi bütövlüyü məsələsinə də öz düşmən mövqeyini açıqlayıb və rəsmi Moskvanı postsovet məkanındakı  bəzi digər qondarma separatçı qurumlar kimi, işğal altındakı torpaqlarımızda qondarılmış separatçı erməni rejimini də “müstəqil dövlət” kimi tanımağa dəvət edib. 

 

“Biz Rusiyanın ATƏT-dən çıxması  kursunu götürməliyik. “Dağlıq Qarabağ Respublikası”, “Dnestryanı Moldova Respublikası”, “Donbas Xalq Respublikası” və “Luqansk Xalq Respublikası”nı tanımaq lazımdır. Və bununla Sovet İttifaqının dağılması zamanı edilmiş səhvləri düzəltmək gərəkdir”- deyə ermənipərəsət politoloq bildirib.  

 

M.Demurin Rusiyanın Qərbə qarşı daha aqressiv siyasətə keçməli olduğunu vurğulayıb:

 

“ATƏT kimi bütün digər beynəlxalq təşkilatlar da hazırda Qərb tərəfindən idarə olunur. Biz onların üzərində nəzarətimizi bərpa edə bilmək imkanına malik deyilik.  Qərblə qarşıdurma uzunmüddətli bir məsələdir; heç kəsi sözlə bir şeyə razı salmaq olmaz. Deməli,   daha da fəal  toparlanmaq lazımdır. Ona-buna qucaq açmağın, açıq-aydın düşmən olanlarla əməkdaşlıq etmək arzusunun  heç bir köməyi yoxdur...”

 

“Mövcud beynəlxalq sistem dağılır. Yenisi isə  bir qarşıdurma anında ölkəmizin nə qədər güclü olacağına əsaslanan yeni müqavilələr nəticəsində yaradılacaqdır. Rusiya bu anda nə qədər az düyünlərlə  bağlı olacaqsa, o qədər yaxşı olacaq.  Ümumavropa təşkilatlarından  nə qədər çox uzaq olacağıqsa, onların dağıntıları bizi bir o qədər az zədələyəcək...”-deyə Rusiya analitiki Qərb dəyərləri üzərində qurulmuş sistemlərin tezliklə çokəcəyini iddia edib.

 

P.S. Qorxuruq, bu gedişlə Çar Rusiyası dağılanda, sovet-sosialist sistemi çökəndə ermənilərin ölkəmizdən ya “könüllü”, ya zorla torpaq aldıqları kimi, dermokratik Qərb sistemi söküləndə də düşmənlər yenə bizdən nəsə qoparsın...

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary