”Ölkəmizdəki Gürcüstan Səfirliyinə nota verilməlidir ki, bir də belə hal təkrarlansa, Azərbaycan ordusu sizə layiqli cavabı verəcək. Bu çox ağır hadisədir, provokasiyadır. Arxasında nə gizləndiyini hələ bilmək olmur. Bu hadisədə başqalarının da əli ola bilər ki, gürcülərlə aramızı vursunlar. Azərbaycanlılar gedib pullarını Gürcüstana tökməsinlər".

Eurasia Diary xəbər verir ki, bu barədə "Bakupost.az"a Milli Məclisin deputatı Aqil Abbas Azərbaycan-Gürcüstan sərhədində "Keşikçidağ" məbədi ətrafında baş vermiş insidentə münasibət bildirərkən deyib.

Millət vəkili bu hadisənin ona pis təsir etdiyini deyib:

"Həqiqətən bu hədisə mənə pis təsir etdi. Gərək sərhədçilər döyülsə də, silahı verməyəydi. Gürcüstan dövləti bizdən üzr istəməli, sərhəçilərinə tapşırıq verməlidir ki, sərhəddə azərbaycanlılarla normal davransınlar.  Eləcə də öz vətəndaşlarına. Əks halda, bu dövlətlər arasında münaqişələrə səbəb ola bilər. Sərhəddimi keçmisən, qanunu pozmusan. Amma bunun sonrası nə olacaqdı, mən bilmirəm. Qələt edib qayıdacaqlar yerlərinə. Yəni nə edəcəkdilər?! Sərhədi keçən adam güllələnməlidir. Bu, bütün dünyanın qanunlarındadır. Rusiya təyyarəsi bir neçə saniyə Türkiyənin üstündən uçmuşdu, onu vurmuşdular. Bu, mənim sərhəddimdir sən burdan necə keçəcəksən?”