BAMF işğal olunmuş Dağlıq Qarabağda qeyri-qanuni "seçkilər"i və qondarma "andiçmə"ni qınayır | Eurasia Diary - ednews.net

26 May, Çərşənbə axşamı


BAMF işğal olunmuş Dağlıq Qarabağda qeyri-qanuni "seçkilər"i və qondarma "andiçmə"ni qınayır

Siyasət A- A A+
Beynəlxalq Avrasiya Mətbuat Fondu (BAMF) işğalçı ölkə Ermənistan tərəfindən Azərbaycanın zəbt olunmuş Dağlıq Qarabağ bölgəsində qanunsuz "seçkilər"in və qondarma “andiçmə”nin keçirilməsini kəskin şəkildə qınayır.
 
Ermənistan bu davranışı ilə açıq şəkildə beynəlxalq hüququn bütün norma və prinsiplərinə məhəl qoymadan, Azərbaycanı müharibəyə təhrik edir. Bu, Dağlıq Qarabağ münaqişəsi ilə bağlı bütün danışıqlar prosesinə və ATƏT-in Minsk qrupunun səylərinə hörmətsizliyin bariz nümayişidir.
 
Münaqişənin guya ki, sülh yolu ilə həllinin tərəfdarı olan Ermənistan, eyni zamanda işğal olunmuş Dağlıq Qarabağda qanunsuz "prezident seçkiləri"nin keçirilməsinə və hazırda mayın 21-də Azərbaycanın işğal olunmuş, Azərbaycan xalqının tarixi və mədəni irsi sayılan Şuşa şəhərində "andiçmə" keçirərək vəziyyəti gərginləşdirməklə danışıqlar prosesini uzatmaq üçün mümkün olan hər şeyi edir.
 
Təxminən 30 il əvvəl Azərbaycana qarşı qanunsuz güc tətbiq edilməsi və qanlı etnik təmizləmənin həyata keçirilməsi nəticəsində Ermənistan işğal etdiyi ərazilərdə separatçı rejim qurdu. Azərbaycanın beynəlxalq səviyyədə tanınan ərazilərinin hal-hazırda 1/5 hissəsi işğal altındadır. Yüz minlərlə azərbaycanlı məcburi köçkünün əsas hüquqları ciddi şəkildə pozulub. Azərbaycanın işğal olunmuş bölgələrində mədəni irsin və iqtisadi fəaliyyətin məhv edilməsi prosesi davam edir ki, bu da beynəlxalq hüququn prinsiplərinə və BMT Təhlükəsizlik Şurasının Ermənistan işğalçı qüvvələrinin dərhal və qeyd-şərtsiz Azərbaycan ərazisindən çıxarılmasına çağıran dörd qətnaməsinə ziddir.
 
Azərbaycan xalqının səbri tükənməz deyil və nəticədə İrəvanın bu davranışı bölgədə genişmiqyaslı hərbi əməliyyatların başlaması təhdidi yaradır ki, bu da bütün sülh danışıqları prosesinə ciddi təsir göstərəcəkdir.
 
Ermənistan silahlı qüvvələrinin öz doğma yurdlarından qovulmuş dinc əhalinin, qaçqın və məcburi köçkünlərin heysiyyatı ilə oynamaq cəzasız qala bilməz.
 
Beynəlxalq Avrasiya Mətbuat Fondu ATƏT-in Minsk Qrupunun həmsədrlərini bu prosesi təkcə müşahidə etməməyə, həmçinin təcavüzkar ölkə olan Ermənistana qarşı konkret tədbirlər görməyə çağırır.

 

EDNews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...