14 iyun 2020-ci ildə Dağlıq Qarabağın Azərbaycanlı İcması sədrinin Qarabağ bölgəsinin erməni sakinlərinə etdiyi son müraciət, həmçinin Tural Gəncəliyevin müraciəti erməni dilində oxuması bəzi azərbaycanlıların narazılığına səbəb oldu. Onların bir qismi Gəncəliyevin ermənilərlə sülh barədə danışmasını Azərbaycan Respublikası üçün zəiflik əlaməti kimi qəbul edir, digər bir qisim onun azərbaycanlılarla müharibə aparanların dilindəki çıxışına təəccübləniblər. Rəsmi Bakının bu mövqeyinin yeni olmamasına baxmayaraq, Tural Gəncəliyev Azərbaycan Respublikası tərkibində barışıq təklifi ilə ermənilərə niyə müraciət etdi? Niyə mətni erməni dilində oxudu? Ednews.net bu sualları Dağlıq Qarabağın Azərbaycanlı İcmasının daxili və xarici məsələlər üzrə məsləhətçisi Anastasiya Lavrinaya ünvanlayıb. A. Lavrina saytımıza açıqlama verib.
- Təxminən 30 ilə yaxındır ki, Ermənistanla Azərbaycan arasında Dağlıq Qarabağ münaqişəsinin həlli ilə bağlı aparılan diplomatik danışıqlar heç bir nəticə verməyib. Ermənistanda hakimiyyət bir neçə dəfə dəyişib, lakin yürüdülən siyasi xəttdə xüsusi bir dəyişiklik baş verməyib. Azərbaycanın işğal olunmuş ərazilərində vətənpərvərlik haqqında yüksək tribunalardan səslənməkdə davam edən şüarlar tərəflərdən birini həvəsləndirir, digərini qıcıqlandırır.
Əlbəttə ki, Ermənistanda işğal altındakı ərazilərin qaytarılması barədə eşitmək belə istəməyənlərin sayı çoxdur. Xüsusilə, bu öldürmək və işğal etmək haqda şüarlarla yetişən gənclərə aiddir. Ancaq bu vəziyyətdən yumşaq desək, bezən insanlar da var. İşğal olunmuş ərazilərdə məskunlaşmış insanlar, Suriyadan olan, humanitar prinsiplərdən uzaq və ancaq əhalinin artması arzusu ilə orada məskunlaşdırılmış etnik erməni qaçqınları. Necə düşünürsünüz, onlar bütün bu baş verənlərdən məmnundurlar? Əlbəttə ki, yox.
Müraciət mövcud vəziyyətdən məmnun olan Yerevan ermənilərinə deyil, konkret olaraq Dağlıq Qarabağ bölgəsindəki ermənilərə, münaqişə həll edildikdə birlikdə yaşamalı olduğumuz şəxslərə edilib. Gec-tez münaqişə, sülh yolu ilə və ya hərbi yolla həll ediləcək, Azərbaycan xalqı öz doğma torpaqlarına qayıdacaq və bundan sonra Azərbaycanın Dağlıq Qarabağ bölgəsinin erməni icması ilə yenidən birlikdə yaşamağı öyrənməliyik.
Azərbaycanın Dağlıq Qarabağ bölgəsinin azərbaycanlı icması hər zaman erməni icması ilə əlaqələrin qurulması və dialoqun yaradılmasını istəyib. İcma sədri Tural Gəncəliyevin son müraciətində qeyri-adi heç nə yoxdur, sadəcə budəfəki müraciət mövqeyimizi daha geniş auditoriyaya çatdırmaq və məhz Qarabağın mülki əhalisinə bizim dialoqa və ünsiyyətə açıq olduğumuzu göstərmək məqsədi ilə erməni dilində səsləndirildi. Barışıq, habelə əhalini sülhə hazırlamağın zəruriliyi haqqında dəfələrlə ATƏT-in Minsk Qrupunun həmsədrləri danışıblar. Ümidvarıq ki, Azərbaycanın Dağlıq Qarabağ bölgəsindəki erməni icması müraciətimizə yaxın zamanda cavab verəcəkdir", -deyə Azərbaycanın Dağlıq Qarabağ bölgəsinin azərbaycanlı icmasının daxili və xarici məsələlər üzrə məsləhətçisi Anastasiya Lavrina bildirib.