"Azərbaycanda təxribata əl atan qüvvələr var" - Umud Mirzəyev çağırış etdi | Eurasia Diary - ednews.net

11 Avqust, Çərşənbə axşamı


"Azərbaycanda təxribata əl atan qüvvələr var" - Umud Mirzəyev çağırış etdi

Siyasət A- A A+

“Son dövrlər sanki gizli bir əl Azərbaycanda vətəndaşla hökuməti qarşı-qarşıya gətirmək, xaos yaratmaq istəyir. Çox təəssüflər olsun ki, bu gizli əl öz işində sosial şəbəkədən və qondarma mətbuatdan geniş istifadə edir. Azərbaycan Respublikası ciddi bir təxribatla üz-üzədir, həm hökumətimiz, həm də vətəndaşlarımız son dərəcədə diqqətli olmalı, bu çətin dövrdə həmrəy olmalıdır”.

Bu fikirləri EDNews.net-ə açıqlamasında Beynəlxalq Avrasiya Mətbuat Fondunun (BAMF) prezidenti, Mətbuat Şurasının sədr müavini Umud Mirzəyev qeyd edib.

“Diqqət edin, bəzi qüvvələr polislə vətəndaş arasında yaşanan problemin o qədər üzərinə getdilər ki, əhali ilə onu qoruyan polis arasında az qala süni düşmənçilik yaratdılar. Eyni qüvvələr Kür çayının qurumasını “su inqilabına” çevirməyə çalışdılar. Daha sonra sosial şəbəkələrdə şayələr yaydılar ki, guya cəbhə xəttində ermənilər bir neçə postumuzu ələ keçirib. İndi də AzTV qarşısında 26 iyunda keçirilən dövlət tədbirində iştirak etmiş hərbi texnikanın şəklini “ölkədə çevrilişə cəhd edilir” başlığı ilə yaymağa başlayıblar. Bu qüvvələrin arxasında kim durur və onların Azərbaycanda xaos yaratmaqda nə maraqları var? İlk öncə bunlar müəyyənləşdirilməlidir.

Bu məsələdə ən böyük məsuliyyət isə yerli mətbuatın üzərinə düşür. Lakin təəssüflər olsun ki, hazırda mətbuat yeni komanda ilə köhnə komanda arasında savaşın cəbhəsi halına gəlib. Hər gün bir məmur haqqında əsassız, böhtan xarakterli məlumatlar yayılır. Mətbuatda parlaq zəkası ilə seçilən jurnalistlər də bu savaşın əsgərinə çevrilib. Bəziləri köhnə komanda haqqında ağır ittihamlar irəli sürür, bəziləri onları müdafiə edir və yeni komandaya qarşı iddialar səsləndirir. Bəylər, xanımlar, mətbuatın işi döyüşmək deyil, əgər bu qədər döyüşmək arzusundasınızsa qarşımızda bizə tankıyla, topuyla hücum edən Ermənistan var. Real düşmənlə informasiya müharibəsi aparmaq lazımdır, bir-birimizlə yox. Bir daha qeyd etmək istəyirəm ki, indi həmrəylik vaxtıdır, birlik vaxtıdır. Və bu həmrəyliyi təmin etmək medianın və media rəhbərlərinin borcudur”, -deyə U.Mirzəyev əlavə edib.

EDNews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...