Milli Məclisin Mədəniyyət komitəsinin sədri Qənirə Paşayeva Ekologiya və Təbii Sərvətlər Nazirliyinin mətbuat katibi İradə İbrahimovanın “Özünü qoru, çevrəni xilas et” devizi ilə yaradılmış Media Hərəkatına dəstək nümayiş etdirib.
Komitə sədri EDNews.net-ə açıqlamasında sağlamlığımıza biganə qalmamağı və məsuliyyətli olmağı tövsiyə edib:
“Mən də İradə İbrahimovanın Media Hərəkatını dəstəkləyirəm. Tibbi maskadan hər birimiz istifadə etməliyik. Dövlətin koronavirusun ilk günlərindən qabaqlayıcı tədbirlər görməsi, məhdudlaşdırıcı qaydalar tətbiq etməsi diqqətəlayiqdir, amma qaydalar yumşaldılandan sonra bir sıra insanlarımızda bir arxayınlıq yarandı. Bəzi vətəndaşların maskadan istifadə etməməsi, sosial məsafəni gözləməməsi nəticəsində virusa yoluxanların sayı surətlə artmağa başladı. Yoluxmanın daha da surətlənməməsi üçün koronavirusla mübarizədə məhdudlaşdırıcı tədbirlərin görülməsi, cərimələrin tətbiqi zərurətə çevrilib. “Prezidentin tibbi maskadan istifadə ilə bağlı dedikləri, bu mövzuda bir daha çağırışlar etməsi diqqətçəkən məqamlardandır. Azərbaycan Prezidenti birmənalı olaraq vətəndaşları ehtiyatlı olmağa, sanitar-gigiyena qaydalarına riayət etməyə çağırdı: Bütün qapalı yerlərdə maska taxıram. Yaxşı, indi Prezident bunu edirsə, niyə başqası edə bilməz? Nə çətin şeydi bu? Heç bir əziyyət vermir, heç bir problem yaratmır. Sadəcə olaraq, məsuliyyətsizlik və deyə bilərəm ki, eqoizm və biganəlik.…Gərək indi məsuliyyətsiz adamlar bunu dərk etsinlər. Bir də ki, bu adamlara qarşı ictimai qınaq olmalıdır. Qapalı yerlərdə maska taxmayana qarşı, əlbəttə ki, cərimə tətbiq edilməlidir. Amma, eyni zamanda, bunu görən başqa vətəndaş onu tənbeh etməlidir, onu başa salmalıdır. Gözləməməlidir ki, polis gələcək, onu cərimələyəcək. Polis də insanları qorumaq üçün gecə-gündüz küçələrdədir, gecə-gündüz fasiləsiz işləyir. Ona görə qapalı şəraitdə hər kəs maska taxmalıdır”.
Deputat vurğulayıb ki, sərtləşdirilmiş tədbirlərin əsas məqsədi yoluxmanın sürətini azaltmaqdır. Hər kəs yaxşı bilir ki, peyvəndi və dərmanı tapılanadək koronavirus bizimlədir və biz bu virusla yaşamağa məhkumuq. Dövlətin başçısının da vurğuladığı kimi, artıq kütləvi surətdə yeni davranış qaydaları tətbiq edilməlidir. Dövlət tərəfindən atılmış addımlar kütləvi surətdə ictimaiyyət tərəfindən tam dəstəklənməlidir. Bizim dövlətimizə dəstəyimiz ondan ibarətdir ki, 3 adi qaydanı - maska, məsafə və dezinfeksiya –gözləyək, məsuliyyətli, nizam-intizamlı olaq və karantin qaydalarına ciddi əməl edək”.