İran KİV-ndə Ermənistan-Azərbaycan, Dağlıq Qarabağ münaqişəsi və son dönəmdə sərhəddə baş verən hadisələrlə əlaqədar məqalələr dərc olunub.
EDNews.net xəbər verir ki, məqalələrdə münaqişənin həllinə dair Tehranın vasitəçiliyi təklif olunur, eləcə də Qərb ölkələrinin vasitəçiliyinə qarşı fikir yürüdülür.
Əlireza Cabarinin iyulun 14-də rəsmi İRNA xəbər agentliyində dərc olunmuş “Bakı ilə İrəvan arasındakı qarşıdurmalar bölgənin maraqlarına uyğun deyil” sərlövhəli məqaləsi buna sübutdur. Burada o, münaqişənin tarixini şübhəsiz qərəzli təqdim edir, eyni zamanda 30 il əvvəl münaqişənin yaranmasında Qərbin rolunun olduğunu istisna etmir. Müəllif Minsk Qrupunun yaranmasına toxunaraq, Qərbin bu problemi həll etmək üçün bir çox layihələr təklif etdiyini, lakin praktikada heç bir addım atılmadığını vurğulayır. Sonra o, Qərbin nə müharibə, nə də sülhün sərfəli olmadığı məsələnin həllində maraqlı olmadığı qənaətinə gəlir.
O problemin həlli üçün təklif edir ki, İrəvan-Bakı danışıqları yolu ilə vasitəçilər olmadan, iki ölkə hökumətlərinin nəzarəti altında, xarici, xüsusən də Qərbin müdaxiləsi olmadan müstəqil kadrlar yaradılsın. Sonra isə tərəflər Qarabağ hökumətini muxtar hökumət kimi tanıyır. Ermənistanın və Azərbaycanın onun daxili işlərinə müdaxiləsi müstəqil kadrlar tərəfindən müəyyənləşdiriləcək. Sonuncu hər hansı uğur və ya razılaşma barədə beynəlxalq qurumlara məlumat verəcək.
İyulun 15-də İRNA “Qarabağ probleminin dinc yolla həllinə əsassız ümidlər” adlı başqa bir məqalə dərc edib. Burada deyilir ki, Ermənistan və Azərbaycan arasında baş verən son toqquşmalar Minsk qrupunun vasitəçilik missiyasının zəif olduğunu sübut etdi, buna görə də bölgədə sülhün bərqərar olması üçün yeni bir vasitəçi seçilməlidir. Sonra vurğulanır ki, ekspertlər region dövlətlərinin yeni vasitəçilikdə fəal iştirakını zəruri sayırlar. Başqa sözlə, bu, İranın Bakıdakı səfiri, eləcə də İranın xarici işlər naziri Zərifin təkliflərini də nəzərdə tutur.
Əsasən qərəzli mövqedən çıxış edən Qərb ölkələrinin farsdilli mətbuatında isə hər iki tərəfin fikirlərini təqdim edən Euronews.com fi rfi.fr/fa/ qərəzsiz sayıla bilər. "Almaniyanın səsi" dw.com/fa-ir/ nəşrlərində 2016-cı ildən fərqli olaraq qərəzsiz olmağa çalışacaqlarını desələr də, bu baş vermədi. Bunu həm xəbərlər, həm də analitiklərin son hadisələrə dair qərəzli nəşrləri sübut edir.
Məsələn, 12 iyulda Azərbaycan Müdafiə Nazirliyinin açıqlaması tam olaraq təqdim edilib, burada ermənilərin çox sayda itki verdiyi, Azərbaycan tərəfdən 2 şəhid və 5 yaralının olduğu bildirilib. Etibarlı mənbələrə əsaslanaraq vurğulanır ki, ermənilər postlardan birini almaq istəyib, lakin onlara qarşı sərt tədbirlər görülüb. Sonra erməni müdafiə nazirliyinin nümayəndəsi Şuşan Stepanyanın Facebook-dakı paylaşımına da istinad edilib, eyni zamanda balans gözlənilməyib.
Bundan əlavə, "Ermənistan-Azərbaycan qarşıdurması genişmiqyaslı müharibəyə çevriləcəkmi?" adlı məqalədə müəllif, Ermənistanı atəşkəs rejimini pozmaqda ittiham edərək, ölkədəki daxili vəziyyəti əsas gətirərək, "Paşinyanın mövqeyi zəiflədiyinə görə keçmiş prezidentlərin tərəfdarları aktivləşib və səbəb təkcə bu deyil", deyib. Həmçinin, Qarabağdan olmayan, Rusiya yönümlü olmayan baş nazir bu məsələdə uğursuzluğa düçar olmaqda ittiham olunur. Müəllif Minsk qrupunu səriştəsizlikdə günahlandırır, onun sözlərinə görə, Azərbaycan işğal olunmuş əraziləri hərbi yolla geri qaytarmaq istədikdə Rusiya buna mane olur.