Ermənilərin gecə Gəncə yuxudaykən şəhəri ballistik raket atəşinə tutması nəticəsində yaşayış massivində 20 ev yerlə bir oldu və 13 soydaşımız – 3-ü körpə uçqun altında qalaraq dünyasını dəyişdi və 52 vətəndaşımız da yaralandı…
Həmişəki kimi Avropa İttifaqı guya Azərbaycanın dərdinə “məlhəm olurmuş kimi” qısa məzmunlu və səbəbkar tərəf olan Ermənistanın adını belə çəkmədən bir təsəlli bəyanatı yolladı.
Avropa İttifaqı oktyabrın 17-də gecə Azərbaycanın Gəncə şəhərinə həyata keçirilmiş, mülki insanların həlak olması və yaralanması ilə nəticələnmiş hücumu pisləyib.

AZƏRTAC xəbər verir ki, Avropa İttifaqının bununla bağlı açıqlamasında hər hansı tərəfin mülki şəxslərin və obyektlərin hədəfə alınmasına son qoymalı olduğu bildirilir.

Qeyd olunur ki, oktyabrın 10-da əldə edilmiş atəşkəs razılaşmasına hörmət edilməlidir…

Beləliklə, Avropa İttifaqı “diplomatik bəyanat”ı ilə növbəti dəfə Azərbaycana qarşı qeyri-dəqiqliyə yol vermiş oldu. Azərbaycan xalqına guya təsəlli verirmiş kimi Aİ bəyanatında nə təcavüzün kim tərəfindən törədildiyini, nə də qarşı tərəfin hansı ölkə olduğunu açıqlamadan Gəncə faciəsini “pislə”di. Bir həftədə 2 dəfə terrorçu Ermənistan Gəncəni raket atəşinə tutaraq dinc əhalini qətlə yetirdi. Bu hələ yaxın günlərimizdə Azərbaycana qarşı düşmən ölkənin terror təcavüzü idi. Bəs, ötən 30 il müddətində nə qədər təcavüzlər, terror aktları olub Azərbaycana qarşı? Nə qədər dinc əhali, uşaq, yaşlı vətəndaşımız həlak olub? Haradaydı Avropa İttifaqı o zaman? Əgər Azərbaycan terrorçu Ermənistanın hərəkətlərini etsəydi, Aİ dərhal əzbərlədikləri “sanksiya” məfhumlarını işə salar və Azərbaycana qarşı əks tədbirlərin görülməsini tələb edərdi.

Aİ özünü daim insan haqlarının müdafiəçisi və ədalətin yanında olduğunu bəyan etsə də, sözü ilə əməli tərs mütənasib gəlib. İkili yanaşma siyasəti Avropa İttifaqı kimi bir sıra Beynəlxalq qurumların da fəaliyyətlərinin özəyini təşkil edir. BMT-nin işğal altında olan Azərbaycan torpaqlarından Ermənistan qoşunlarının çıxarılmasını tələb edən dörd qətnaməsinə, digər qərarlara Ermənistan nəinki məhəl qoymur, hətta döyüş bölgəsindən uzaq olan Azərbaycan yaşayış məntəqələrini atəşə tutaraq dinc əhalini qətlə yetirməkdədir. Aİ isə balanslı siyasət yürüdərək susmaqdaydı.

QAİB olaraq Aİ-nın indiki “bəyanat”ını dolayısıyla terrrorçu dövlət Ermənistanı dəstəkləmək kimi qiymətləndiririk. Bu qurum Xocalı soyqırımını törədən bir dövlətə qarşı nəinki hər hansı bir sanksiya tətbiq edir, əksinə, ona Fransanın timsalında yardımlarını və dəstəklərini gücləndirir. Axı necə olur ki, insan haqlarını və dövlətlərin ərazi bütövlüyünü əsas şərt kimi götürən Avropa İttifaqı erməni terroruna göz yumur? Budurmu birliyin əlində bayraq kimi tutduğu insan haqları və ədalət? Bu Aİ-nin beynəlxalq hüquq normaları baxımından yalnız və yalnız separatçıları dəstəkləməkdən başqa bir şey deyil.

Artıq bu qurum beynəlxalq müstəvidə nüfuzunu itirmişdir. Özlərinə bel bağlamayan Aİ hansı meyarlarla gəlib başqa bir dövlətə canı yana bilər, yaxud onun haqq-ədalət səsinə səs verər. Avropa İttifaqı kimi bir sıra Beynəlxalq qurumların daha “təsəlli”, “təskinləşdirici” səthi bəyanatlarına Azərbaycanın ehtiyacı yoxdur.

Yetər daha. Müstəqil, güclü iqtisadiyyata və siyasi sabitliyə malik Azərbaycan öz gücünə, öz iradəsinə və öz qətiyyətinə inanır. Çağdaş bir qüdrətli dövlət kimi Azərbaycanın öz müstəqil və uğurlu xarici siyasətinə arxalanaraq, xalqımızın ümumi birliyi sayəsində işğal altında olan torpaqlarımızın qurtarılması prosesini başa çatdıracaq, dünya dövlətləri sırasında onunla hesablaşıla biləcək qüdrətli, güclü bir ölkəyə çevriləcəyik.

Ramiz Məşədihəsənli,

Qərbi Azərbaycan İctimai Birliyi Mətbuat və İnformasiya Şöbəsinin müdiri, 
TÜRKEL media baş redaktoru, TÜRKSOY mükafatı laureatı