Rusiyanın xarici işlər naziri cənab Lavrovun ötən ilin nəticələrinə həsr edilən bu yaxınlarda keçirdiyi mətbuat konfransında jurnalistin "Laçın dəhlizi" ilə Ermənistandan Qarabağ ərazisinə nəzarətsiz girişə icazə verilməsi barədə sualına cavabı təəccüb doğurdu. O bildirdi ki, bu normaldır və Azərbaycan, Ermənistan və Rusiya arasında üçtərəfli razılaşmalarla ziddiyyət təşkil etmir. Bu təxribatçı cavab narahatlığa əsas verir. Birincisi, Qarabağ azad zona deyil, Azərbaycanın beynəlxalq ictimaiyyət tərəfindən, o cümlədən Rusiya tərəfindən tanınan suveren ərazisidir və buraya giriş ölkənin müvafiq orqanları tərəfindən bu və ya digər şəkildə izlənilməli və nəzarət edilməlidir. Rusiyanın sülhməramlı qüvvələrini Qarabağda yerləşdirməsi dövlətlərarası münasibətlərin və sərhəd qaydalarının ümumi qəbul edilmiş müddəalarını dəyişdirə bilməz. İkincisi, Lavrovun cavabı dolayısı ilə bu mətbuat konfransından bir neçə gün əvvəl Qarabağa təkcə Ermənistanın sadə vətəndaşlarının deyil, həm də bu ölkənin dövlət rəsmilərinin sərbəst səfər etməsinə qarşı çıxış edən Prezident İlham Əliyevin əsaslı fikirlərinə qarşı yönəldilib.
Lavrovun peşəkarlığını və onun hələ də məntiqlə ziddiyyətdə olduğunu nəzərə alsaq, cavabının təsadüfi deyil, Moskvanın Qarabağa Azərbaycandan asılı olmayan de-fakto xüsusi status vermək niyyətindən irəli gəldiyi qorxusu yaranır. Bir müddət sonra isə yaranmış vəziyyəti 30 ildir məhz buna nail olmağa çalışan Minsk qrupunun nümayəndələrinin köməyi ilə de-yure müəyyənləşdirəcək.
Minsk Qrupunun Bakıya son səfəri zamanı Prezidentimiz onlara açıq şəkildə dedi ki, missiyaları başa çatıb, Azərbaycan ordusu və xalqı qəhrəmanlığı sayəsində özü Qarabağ problemini həll edib və bundan sonra Qarabağın xüsusi statusundan söhbət gedə bilməz.
Azərbaycan çoxmillətli, çox konfessiyalı ölkədir, burada multikulturalizm dövlət siyasətinin əsasını təşkil edir, milliyyətindən və dinindən asılı olmayaraq bütün vətəndaşlara lazımi hüquqlar verir. Bu şərtlərdə xarici qüvvələr tərəfindən bir qisim erməniyə vətənimizdə xüsusi statusun verilməsi cəhdi təəccüb doğurur. Azərbaycan ictimaiyyəti bütün gücü və imkanları ilə Prezident İlham Əliyevin bu məsələdə əsaslandırılmış mövqeyini dəstəkləyəcəkdir.
Azərbaycan Respublikası Müharibə, Əmək və Silahlı Qüvvələr Veteranları Təşkilatının sədr müavini polkovnik Cəlil Xəlilov
