Belarus Prezidenti Aleksandr Lukaşenko Bakıya səfərdədir. İlk öncə Belarus dövlət başçısı Azərbaycan Prezidenti İlham Əliyevlə qeyri-rəsmi formada görüş keçirib. Belarus mətbuatının verdiyi məlumata görə, təxminən 5 saat çəkən bu görüşdə beynəlxalq məsələlər müzakirə edilib.

İki dövlət lideri bu gün rəsmi formada görüş keçirib və bir sıra bəyanatlarla çıxış edib. İkitərəfli əlaqələrin inkişafı, karbohidrogen sahəsində əlaqələr və Qarabağın azad edilməsi əsas mövzular olub.

Lukaşenko Azərbaycanın milli arzusuna yəni torpaqlarının azadlığına qovuşduğu üçün sevinc hissini ifadə edib. Azərbaycan Prezidenti İlham Əliyev də Belarus dövlətini dost adlandıraraq, qarşılıqlı ticarət dövriyyəsindəki müsbət dinamikanı vurğulayıb.

Qeyd edək ki, qəfil elan edilən səfərlə bağlı məlumatdan sonra bir çox ekspertlər Lukaşenkonun Azərbaycan səfərinin arxasında hansı məqsədlər durduğu barədə baş sındırmağa başladılar. Bəzi mənbələr Belarus Prezidentinin müharibədən sonra tutulan erməni terrorçuları üçün şəxsi xahişlə gəldiyini, digərləri isə onun “İsgəndər” qalmaqalından sonra Rusiya ilə Azərbaycan arasında vasitəçi olmaq istədiyini bildiridilər.

Atlas Araşdırmalar Mərkəzinin rəhbəri və politoloq Elxan Şahinoğlu Belarus Prezidenti Aleksandr Lukaşenkonun Azərbaycana rəsmi səfərini Eurasia Diary-yə şərh edib.

Politoloq Belarusun Azərbaycanla əməkdaşlığın inkişafına ehtiyacı olduğunu bildirib. O, Minskin iqtisadiyyatında problem olduğunu və buna görə də kreditlərə ehtiyac yarandığını qeyd edib.

“Azərbaycan münasib kreditlər də verə bilər, neftin təminatında da yardım edə bilər. Bizim qarşılıqlı maraqlarımız var, Belarusdan hərbi texnikalar da ala bilərik. Belarusdan “Polonez”raketləri almışıq. Bir sözlə iki tərəfli əməkdaşlıq hər iki dövlətə xidmət edir. Belarus Prezidentinin səfəri də Azərbaycana verdiyi qiymətdir. O, nə Gürcüstana, nə də Ermənistana getmir, birbaşa Azərbaycana gəlir. Lukaşenko Qarabağın işğaldan azad edilməsi ilə bağlı xoş ifadələr işlədir ki, bu da bizim xeyrimizədir. Düşünürəm ki, bugünkü görüşün nəticəsi olaraq, Azərbaycanla Belarus arasında qarşılıqlı əlaqələr genişlənəcək”, deyə Elxan Şahinoğlu söyləyib.

Eyni zamanda, Elxan Şahinoğlu səfərin digər məqamlarının da ola biləcəyini istisna etməyərək, indidən onların haqqında danışmağın tez olduğunu və zamana ehtiyac duyulduğunu vurğulayıb.

Ülvi Əhmədli