“Dünya miqyasında Türkiyə ilə unikal əməkdaşlıq, müttəfiqlik nümunəsi göstəririk” - İlham Əliyev | Eurasia Diary - ednews.net

24 İyul, Şənbə


“Dünya miqyasında Türkiyə ilə unikal əməkdaşlıq, müttəfiqlik nümunəsi göstəririk” - İlham Əliyev

Siyasət A- A A+

“Bu gün biz qardaş ölkənin əziz Cümhurbaşkanı - Rəcəb Tayyib Ərdoğanı Qarabağ torpağında salamlayırıq. Fürsətdən istifadə edərək əziz qardaşımı Şuşada Qarabağda bütün Azərbaycan xalqı adından salamlamaq istəyirəm”.

Eurasia Diary-nin məlumatına görə, bunu Prezident İlham Əliyev bu gün Şuşada Türkiyə Prezidenti Rəcəb Tayyib Ərdoğanla birgə keçirilən mətbuat konfransında deyib.

Dövlət başçısı Türkiyə Prezidentinin Azərbaycanda dəfələrlə olduğunu bildirib: “Ancaq ilk dəfə Qarabağ torpağında, Şuşada biz birlikdəyik. Bu səfərin tarixi əhəmiyyəti var. Çünki bu gün imzalanmış birgə bəyannamə, müttəfiqlik haqqında bəyannamə, əlaqələrimizi münasibətlərimizi ən yüksək səviyyəyə qaldırır. Bəyannamənin adı müttəfiqlik haqqında Bəyannamədir. Bu ad öz-özlüyündə hər şeyi göstərir, hər şeyi deyir. Bu gün biz keyfiyyətcə yeni əlaqələr qurmuşuq. Və bu bəyannamədə göstərilən bütün müddəalar bizim gələcək işbirliyimizin təminatçısıdır. Mən dəfələrlə demişəm ki, bu gün Azərbaycan və Türkiyə dünya miqyasında bir-birinə ən yaxın olan ölkələrdir. Bizi birləşdirən bir çox amillər var ki, bu birliyi təmin edir. İlk növbədə tarix, mədəniyyət, ortaq etnik köklər, dilimiz, dinimiz, milli dəyərlərimiz, milli maraqlarımız və xalqlarımızın qardaşlığı. Bu gün dünya miqyasında biz unikal əməkdaşlıq, işbirliyi, müttəfiqlik nümunəsi göstəririk. İmzalanmış Bəyannamə tarixə əsaslanır. Bəyannamədə xalqlarımızın böyük liderləri - Mustafa Kamal Atatürkün və Heydər Əliyevin kəlamları öz əksini tapıb. 20-ci əsrin əvvəllərində Mustafa Kamal Atatürk deyib ki, “Azərbaycanın sevinci sevincimiz, kədəri kədərimizdir”. 20-ci əsrin sonlarında Heydər Əliyev demişdir ki, “Türkiyə və Azərbaycan bir millət, iki dövlətdir”. Bu tarixi sözlər, kəlamlar bizim fəaliyyətimiz üçün əsas faktordur. Biz bu vəsiyyətə sadiqik və 21-ci əsrdə azad edilmiş Şuşada müttəfiqlik Bəyannaməsini imzalayarkən bizim əcdadlarımıza sadiqliyimizi nümayiş etdiririk və gələcək nəsillərə yol göstəririk”.

APA

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...