Türkiyə Prezident Administrasiyasının Kommunikasiya İdarəsi Prezident Rəcəb Tayyib Ərdoğanla rusiyalı həmkarı Vladimir Putin arasında olan telefon danışığı haqqında məlumat yayıb.
Eurasia Diary-nin verdiyi məlumata görə, iki lider Türkiyə-Rusiya münasibətləri və regional inkişaflar barədə müzakirələr aparıblar.
30 iyulda Moskvada keçirilməsi planlaşdırılan Birgə İqtisadi Komissiyanın iclasında Türkiyə ilə Rusiya arasında 100 milyard dollarlıq ticarət həcminə çatmaq üçün atılacaq addımlar müzakirə edilib.
Şuşaya səfəri zamanı ermənilərin regionda yaratdığı dağıntılara şəxsən şahid olduğunu bildirən Prezident Ərdoğan Ermənistanın hazırda sülh və əməkdaşlığa diqqət yetirməli olduğunu və Rusiya, Ermənistan və Azərbaycan liderlərinin 10 noyabr 2020-ci il və 11 yanvar 2021-ci il tarixli bəyanatlarında təsbit olunmuş razılaşmaların tam şəkildə həyata keçirilməsinin zəruriliyini vurğulayıb.
Prezident Ərdoğan Suriya mövzusuna və PKK/YPG-nin Afrindəki bir xəstəxananı hədəf almasına diqqət çəkərək terror hücumlarının artdığını və bölgədəki terrorçuların ciddi təhlükə yaratdığını qeyd edib.