Vətəndaş və İnkişaf Partiyasının sədri Əli Əliyevin həbsi ilə bağlı yaradılmış Müdafiə Komitəsinin yaydığı bəyanatda Ağ Partiya başqanı Tural Abbaslının da adı yer alıb. Belə ki, yayılan bəyanatda partiya rəhbərinin də imzası əks olunub. Tural Abbaslı isə verdiyi açıqlamasında heç bir bəyanata imza atmadığını açıqlayıb.

Ednews xəbər verir ki, bu barədə Ağ Partiya başqanının ictimaiyyətlə əlaqələr üzrə müavini Cavanşir Abbaslı Facebook paylaşımında bildirib. Partiya bəyan edib ki, bəyanatdan T.Abbaslının məlumatı olmayıb və partiyanın 14 yanvar tarixli bəyanatında bu həbsə olan mövqeləri tam şəkildə ifadə olunub.

Məsələ ilə bağlı Ednews Tural Abbaslı ilə əlaqə saxlayıb. O, Əli Əliyevin azadlığa buraxılmasının tərəfdarı olduğunu və bununla bağlı bəyanat verdiklərini qeyd edib.

“Əli Əliyevin müdafiə Komitəsinin üzvüyəm. Partiyadan bir neçə nəfər də həmin komitənin üzvüdür. Mövqeyimiz məlumdur. Yanvarın 14-də partiya olaraq ayrıca bəyanatımız da vardı. Sadəcə olaraq, iki gün bundan öncə Müdafiə Komitəsinin toplantısı keçirildi. Orada bəyanat verilməsi haqda bir fikir olub. Adətən protokola görə bəyanatın mətni göndərilir, razılaşdırılır və sonradan bəyanatın mətni ilə razılaşan şəxslərin, təşkilatların adından bəyanat yayılır. Amma təəssüflə qeyd edirəm ki, ya təşkilatçıların təcrübəsizliyindən ya da bəyanat yayan adamın bilgisizliyindəndir ki, Ağ Partiya başda olmaqla bir çox partiyalara bəyanat göndərilmədən, yəni oradakı fikirlər razılaşdırılmadan bəyanatların altında həmin təşkilatların, şəxslərin adları yazılıb. Mən orda imzası olan bir neçə partiya ilə maraqlandım. Onların da rəhbərləri bildirdilər ki, bizə də məlumat verilmədən adımız orda qeyd olunub. Düşünürəm ki, bu protokola uyğun deyil. Çünki orda bəzi fikirlər var ki, biz şəxsən o fikirlərlə razı deyilik. İmzamız olacaqsa o fikirlərin dəyişdirilməsi və korrekt yazılmasıyla bağlı fikir bildirə bilərdik”.

Partiya başqanı həmçinin qeyd edib ki, yaranan anlaşılmazlıqla bağlı artıq partiyaya müraciət olunub.

“Artıq iradımızı Vətəndaş və İnkişaf Partiyasının nümayəndələrinə bildirmişik. Onlar da bu yaranan vəziyyət barədə üzrxahlıq edib texniki yanlışlıq olduğunu bildirdilər. Bizim Əli Əliyevin azadlığa buraxılmasına heç bir etirazımız yoxdur, sadəcə olaraq bu ciddi partiyalardır və bu məsələdə daha diqqətli olmalıyıq".

Ağ Partiya başqanının ictimaiyyətlə əlaqələr üzrə müavini Cavanşir Abbaslı isə açıqlamasında bildirib ki, bu xəbərlər yayılan kimi Vətəndaş və İnkişaf Partiyasından Zaur bəylə əlaqə saxlayaraq ona öz iradlarını bildiriblər. O, isə öz növbəsində yaranan anlaşılmazlığa görə, üzrxahlıq edib.

Bəs, partiyanın adını əsassız belə bir məsələdə hallandırmasına görə, Ağ Partiyanın rəsmi olaraq, məhkəməyə müraciət etmək fikri varmı?

Cavanşir Abbaslı qeyd edib ki, bunun uçün heç bir səbəb yoxdur.

“Belə bir mərhələdə hüquq mühafizə orqanlarına müraciət etməyimiz siyasi cəhətdən etik sayıla bilməz. Sadəcə olaraq, VİP sədrinin müavini ilə söhbətimizdə bundan sonrakı mərhələdə bəyanatlar qəbul olunarsa mütləq şəkildə həmin sənədin bizə də göndərilməsini bildirdim. Burada artıq məhkəmə müstəvisi də yoxdur”.

C. Abbaslı həmçinin qeyd edib ki, Əli Əliyev barəsində 5 aylıq məhkəmə qərarından qısa zaman sonra Ağ Partiyanın mövqeyi tam şəkildə ifadə olunub.

“Təəssüf ki, bəzi şəxslər guya Ağ Partiyanın mövqeyindən geri çəkildiyi haqqında xəbərlər yayırlar. Bunlar düzgün yanaşma deyil, çünki partiyamızın bununla bağlı bəyanatı var, mövqeyimiz ifadə olunub. Bu şəxslərin belə hallardan sui-istifadə etmələrini düzgün hesab etmirəm”. 

Vətəndaş və İnkişaf Partiyasının sədr müavini Zaur Qasımov isə bildirib ki, bununla əlaqədar iki partiyadan zəng olub.

“Biz bu məsələləri Tural bəyin müavini Cavanşir bəylə müzakirə etdik. AY Partiyanın (Azərbaycan Yüksəliş Partiyasının) üzvü Bəhram bəy də mənə zəng edib. Hər iki partiyanın nümayəndəsilə danışıb yaranan vəziyyətə aydınlıq gətirdik. Buradan bir intriqa çıxarmağa ehtiyac yoxdur”, - deyə o, fikirlərini tamamlayıb.

Gülnar Səlimova