İngiltərə Ali Məhkəməsi etirazlar zamanı PKK terror təşkilatı ilə əlaqəli simvolların daşınmasının ağır cinayət olduğunu təsdiq edib. Hətta bu barədə şikayət edən PKK terrorçu təçkilatının üç üzvünü ağır cəzalandırıb.
Məhkəmənin qərarında bildirib ki, şikayətçi olan Rəhman Pur, İsmayıl Akdoğan və Rotinda Dəmir Türkiyənin 2018-ci il sərhəd əməliyyatında PKK və onun Suriya qolu əleyhinə hərbi mübarizəsinə etiraz edərkən saxlanılıblar.
Ali Məhkəmə "hər biri 2000-ci il qanununa görə qadağan edilmiş bir təşkilat olan PKK-nın bayrağını daşıdığını" irəli sürüb.
Buna baxmayaraq PKK Britaniya Ali Məhkəməsinin son qərarına qədər ölkədə dəfələrlə anti-Türkiyə çağırışları və buna bənzər nümayişlər keçirib. PKK-nın məhz son dönəmdə Qərbdə sərt cəzalandırılması müəyyən suallar doğurub.
Siyasi ekspert Sədrəddin Soltanın fikrincə, Qərb PKK-nı sıxmaqla özünü anti-terror tərəfdarı kimi göstərmək istəyir. O, bu barədə EDNews-a açıqlaması zamanı deyib.
“Qərb bu yolla özünü Ankaranın müdafiəçisi kimi qələmə vermək istəyir. Bu səbəbdən deyə bilərəm ki, Britaniyada baş verənlərin bilavasitə Türkiyə ilə əlaqəsi var. Çünki Qərb dövlətləri vaxtilə Türkiyəyə qarşı bir çox əməliyyatlarda terrorçu təşkilatlarından da istifadə ediblər. Hətta PKK-dan İran və Suriyadakı Əsəd qüvvələri alət kimi sitifadə edib. Lakin son dönəmlərdə Türkiyənin ardıcıl uğurlu anti-terror əməliyyatları ona qarşı fərqli situasiya yaradıb. Qərb artıq Türkiyəyə qarşı təzyiqlərin terror vasitəsilə edilməsinin o qədər də fayda vermədiyini görür. Bu səbəbdən o artıq terrorçularla iş birliyi planını dəyişib, əksinə Türkiyəyə yaxınlaşmaq variantını işə salmağa çalışır”.
Politoloq Türkiyənin Avropada nüfuzunun artmasının digər səbəblərini də açıqlayıb. O, bildirib ki, Türkiyənin son zamanlar İŞİD terrorçu qrupları ilə mübarizəsi zamanı digər qonşu dövlətlərin sərhəd və ərazi bütövlüyünə hörmətlə yanaşması ona qarşı güvəni artırıb. Bundan əlavə S.Soltan bunu ötən ilin sonlarında Belarusla Polşa sərhədləri arasında suriyalı və əfqan qaçqınlarla bağlı artan gərginlikdə Türkiyənin mövqeyi ilə də əlaqələndirib.
“Son aylarda Polşa ilə Belarus rəshədləri arasında baş verənlər Türkiyənin çəkisini artırdı. Türkiyə həm də 3 milyondan çox qaçqına ölkəsində sığınacaq verən bir ölkədir. Bu səbəbdən Avropa onunla hər mənada hesablaşır”.
Qeyd edək ki, Böyük Britaniya 2001-ci ilin martında PKK və ona aid digər qollarını qeyri-qanuni təşkilatlar siyahısına salıb. Daxili İşlər Nazirliyinin məlumatına görə, bu, onların bütün fəaliyyətləri, eləcə də bu qruplara üzvlük və ya onlara dəstək çağırışı qadağan edilib.
Bundan əlavə, PKK Türkiyə, ABŞ və Avropa İttifaqı tərəfindən də terror təşkilatları siyahısındadır.
PKK Türkiyəyə qarşı 35 ildən artıq davam edən terror kampaniyasında qadın, uşaq və körpələr də daxil olmaqla 40 mindən çox insanın ölümünə səbəb olub.
Elnur Ənvəroğlu