Ötən gün “Xural TV”-də jurnalist Əvəz Zeynallının suallarını cavablandıran sabiq Müsavat başqanı İsa Qəmbər Musavat Partiyasının gələcəyi ilə bağlı maraqlı açıqlamalar verib.
Əvəz Zeynallının “Arif Hacılı iki dəfə partiya başqanı seçilib və bu yaxınlarda başqanlığının 8-ci ili tamam olacaq. Musavat partiyasının nizamnaməsinə görə o üçüncü dəfə seçilə bilməz. Elə isə yeni başqan kim olacaq? İsa Qəmbər yenidənmi başqanlığa qayıdacaq?” sualına İ.Qəmbər belə cavab verib:
“Yenidən başqanlığa gəlməyi düşünmürəm, belə bir niyyətim yoxdur. Arif Hacılı Azərbaycanın ən görkəmli ictimai və dövlət xadimlərindən biridir. O çox böyük şərəf və ləyaqətlə partiyaya liderlik edir. Nizamnaməyə və ictimai təlabata uyğun şəkildə onun başqanlığı nə qədər çox davam edərsə bu işin xeyrinədir”.
Hazırda Musavat partiyasında xüsusi çəkisi olan, “dərin başqan” İsa Qəmbərin bu fikirləri səsləndirməsi Arif Hacılının yenidən, üçüncü dəfə seçilməsinə “yaşıl işıq” yandırması kimi şərh olunub.
Qeyd edək ki, Musavat partiyasının nizamnaməsinə görə partiya başqanı sadəcə iki dəfə seçilə bilər. Başqanlıq müddəti isə 4 ildir. Arif Hacılı isə ikinci dəfə 2019-cu ildə Musavatın başqanı seçilib. Yəni, gələn il onun başqanlıq müddəti sona çatır. Sonuncu açıqlamasından belə anlaşılır ki, İsa Qəmbər “ictimai təlabatı” nəzərə alaraq onun yenidən seçilməsinə dəstək verir. Bəs bu dəstək Musavatın daxilində necə qarşılanır?
Musavatın sabiq Divan üzvü, 2019-cü ildə başqanlığa namizəd olan Yadigar Sadıqlı bu barədə EDNews-a geniş açıqlamalar verib:
O, İsa Qəmbərin sonuncu çıxışını təbəssümlə qarşıladığını bildirib.
“ İsa Qəmbərin “ictimai tələbat”a istinad etməsi çox maraqlı oldu. Yadınızdadırsa son qurultay öncəsi ölkə ictimaiyyətinin böyük əksəriyyəti Musavat başqanlığına ya mənim, ya da Tofiq Yaqublunun gəlməsini dəstəkləyirdi. O zaman Arif Hacılının tərəfdarlarının mövqeyi ondan ibarət idi ki, Musavat başqanı seçmək ancaq müsavatçıların öz işidir. Başqaları buna qarışmamalıdır. Halbuki Musavat qapalı bir qurum yox, ictimai bir təşkilat idi. İndi isə İsa bəyin ictimai təlabata istinad etməsi açığı məndə təbəssüm oyatdı” – deyə Y. Sadıqlı qeyd edib.
Yadigar Sadıqlı həmçinin Arif Hacılının yenidən seçilmə ehtimalında Musavat rəhbərliyinin öz prinsiplərinə xəyanət edəcəyini söyləyib.
“Nizamnamənin dəyişilməsi ilə bağlı isə onu deyə bilərəm ki, hazırda mən sıravi üzvəm, rəhbərliyin bu istiqamətdə qərarının olub-olmamasında xəbərsizəm. Lakin İsa Qəmbər faktiki olaraq nizamnamənin dəyişilməyəcəyini demədi, bu çox diqqətəlayiq məsələdir. Xatırlayırsızsa, prezident İlham Əliyevin üçüncü dəfə seçilməsi ilə bağlı konsitutsiyaya düzəliş edilərkən Musavat partiyası buna etiraz etmiş və referendumda edilmiş düzəlişin 2013-cü ildə seçilən şəxsə şamil oluna biləcəyini bəyan etmişdi. Bu prizmadan yanaşsaq Arif Hacılının da üçüncü dəfə partiya başqanı seçilmək hüququ yoxdur. Əgər nizamnamə dəyişsə belə bu 2023-cü ildə seçiləcək başqana şamil oluna bilər. Əgər Arif Hacılı gələn il yenidən seçilərsə Musavat rəhbərliyinin öz prinsiplərinə sadiqliyi şübhə altına düşər.
Lakin Arif Hacılının başqanlığı sadəcə nizamnamə yolu ilə yox, başqa üsulla da artırıla bilər. Müxtəlif bəhanə və səbəblərlə qurultayın keçirilməsi yubadıla bilər. Məsələn, İsa Qəmbər ikinci dəfə 2006-cı ildə seçildi, 2010-cu ildə yenidən qurultay olmalı idi, lakin müxtəlif səbəblər göstərilərək qurultay 2014-cü ilə qədər uzadıldı. İsa Qəmbərin ikinci başqanlığı 8 il çəkdi. Arif Hacılıyla bağlı da belə bir taktika seçilə bilər” – deyə, sabiq divan üzvü əlavə edib.
Mövzuyla bağlı Musavat partiyasının başqanı Arif Hacılı da EDNews-a eksklüziv açıqlama verib. Hacılı partiya nizamnaməsinin dəyişməyəcəyini bildirib.
“Musavat partiyası nizamnaməsində başqanın iki dəfədən artıq seçilə bilməməsi ilə bağlı müddəa bizim fəxr etdiyimiz və demokratik idarəçiliyə yardım edən bir prinsipdir. Bu müddəanın dəyişdirilməsi ilə bağlı partiya daxilində heç bir müzakirə getmir, bunun üçün heç bir əsas yoxdur. Bu o deməkdir ki, mənim üçüncü müddətə Musavat partiyasına başqan seçilməyim mümkünsüzdür” – deyə, A.Hacılı bildirib.
Nicat İsmayılov