Fevralın 3-də Milli Məclisin sədri Sahibə Qafarova Latviyaya rəsmi səfəri çərçivəsində bu ölkənin Prezidenti Eqils Levits ilə görüşüb.
Ednews xəbər verir ki, Latviya Prezidenti Milli Məclisin sədrini salamlayaraq, Azərbaycanın Latviya üçün dost ölkə olduğunu vurğulayıb. O, ölkəsinin Azərbaycan ilə əlaqələrinin müxtəlif istiqamətlərdə daha da inkişaf etdirilməsində maraqlı olduğunu bildirib. Latviya Prezidenti ölkəsinin hər zaman Azərbaycanın ərazi bütövlüyünü dəstəklədiyini və bundan sonra da bu dəstəyin davam edəcəyini bildirib.
Dövlət başçısı Azərbaycan və Latviyanın beynəlxalq təşkilatlar, o cümlədən BMT çərçivəsində yaxşı əməkdaşlıq etdiyini qeyd edib.
Sahibə Qafarova nümayəndə heyətinə göstərilən yüksək qonaqpərvərliyə görə minnətdarlığını bildirib, Azərbaycan Prezidenti cənab İlham Əliyevin salamlarını Latviya Prezidentinə çatdırıb.
Spiker bu səfərin onun Azərbaycan Respublikası Milli Məclisinin sədri kimi Latviyaya ilk səfəri olduğunu qeyd edib və səfər çərçivəsində keçirilən görüşlər və aparılan müzakirələrin ikitərəfli əlaqələrin, həmçinin parlamentlərarası münasibətlərin inkişafına öz töhfəsini verəcəyinə ümidvar olduğunu bildirib.
2021-ci ilin iyun ayında Latviya parlamentinin dostluq qrupunun nümayəndə heyətinin Azərbaycana səfərini xatırlayan Sahibə Qafarova Latviyalı deputatların İkinci Qarabağ müharibəsi zamanı Ermənistanın Gəncəyə raket hücumları nəticəsində dağıdılmış əraziləri və işğaldan azad edilmiş Ağdam və Füzuli şəhərlərində hər şeyi gözləri ilə gördüklərini deyib. Milli Məclisin sədri dostluq qrupunun Xocalı soyqırımı, həmçinin Ermənistanın sərhədimizdə törətdiyi təxribatlarla bağlı bəyanatlarının, Vətən müharibəsi nəticəsində torpaqlarımızın işğaldan azad edilməsi münasibətilə onların dəstək və təbrik məktublarının Azərbaycanda yüksək qiymətləndirildiyini diqqətə çatdırıb.
Görüşdə Milli Məclisin sədri Azərbaycanın 44 günlük Vətən müharibəsi nəticəsində qazandığı Qələbədən danışaraq diqqətə çatdırıb ki, bu gün Ermənistanla Azərbaycan arasında münaqişə artıq mövcud deyil və regionda yeni reallıq yaranıb. Azərbaycan Ermənistana suverenliyin və ərazi bütövlüyünün qarşılıqlı tanınması, sərhədlərin delimitasiyası və demarkasiyası prosesinə başlanması, regionda bütün kommunikasiyaların bərpası və münasibətlərin normallaşmasına gətirib çıxaracaq sülh sazişinin imzalanması ilə bağlı bir sıra təkliflər verib.
.jpg)
