Dövlət Təhlükəsizlik Xidməti Müdafiə Nazirliyində keçirdiyi əməliyyat ölkə gündəmində rezonans yaradıb.
Əməliyyat zamanı nazirliyin maliyyə İdarəsinin rəisi Rafael Xəlilov, N saylı hərbi hissənin maliyyə şöbəsinin rəisi Fəzail Əliyev, Quru Qoşunların maliyyə idarəsinin rəisi Bayram Bayramov və maliyyə idarəsinin zabiti Əlizadə Vüsal dövlət büdcəsindən külli miqdarda mənimsəmə faktına görə saxlanılıb.
Xalq arasında “qara maskalılar əməliyyatı” kimi adlandırdığı bu əməliyyatlar son zamanlar, Mədəniyyət, Xarici İşlər Nazirliyində, Neftçala, Yevlax, Ağstafa, İsmayıllı və bir çox rayonların icra hakimiyyətlərində də keçirilib. Hətta bir çox sosial media iştirakçıları tərəfindən DTX-nın əməliyyat keçirilərkən, xüsusi formada olan əməkdaşları “xilaskar mələk” adlandırılıb və fotoları paylaşılıb.
Prezidentin dəfələrlə ictimaiyyət qarşısında etdiyi xəbərdarlıqlara baxmayaraq, yerlərdə bəzi məmurların qanundankənar əməlləri sosial narazılıq yaradır. İlham Əliyev bir neçə dəfə məmurlara qanunsuz əməllərə son qoymağı, heç kimə qanun qarşısında güzəşt tanınmayacağı ilə bağlı xəbərdarlıq edib və bu cür əməllərdən çəkinməyənlərin cəzalandırılacağını bildirib.
Bəs, siyasi xadimlər bu barədə nə düşünür?.. Onlar öz fikirlərini Ednews-la bölüşüblər...
Azərbaycan Demokrat Partiyasının sədri Sərdar Cəlaloğlu açıqlamasında dövlət strukturlarında bu cür halların qarşısının alınmamasında bir çox özbaşına məmurların böyük özbaşınalığından irəli gəlir.
“Bu cür Korrupsiya, rüşvətxorluq və digər cinayət əməlləri, etimadı doğrultmayan, vəzifəni görüb özünü itirən insanların yaratdıqları şəraitdən irəli gəlir. Belə bir sistemin qurbanına çevrilən məmur ordusu artdıqca, belə yeyinti hallarına çox şahid olacağıq. Nə qədər ki, bu qurumlarda müsbət dəyişikliklər aparılmayacaq rüşvət halları qalmaqda davam edəcək”.
Müsavat partiyasının sədri Arif Hacılı DTX tərəfindən dövlət orqanlarında korrupsiya ilə bağlı aparılan əməliyyaların müsbət nəticələrinin olduğunu bildirib. Lakin o, ölkədə korrupsiyanın tam kökündən kəsilməsinin vacibliyini də vurğulayıb;
“Ölkədə rüşvət hallarının qarşısının alınması üçün ilk növbədə siyasi və iqtisadi sistemdə ciddi tədbirlər görülməli və dəyişikliklər aparılmalıdır. Əgər hər bir strukturda maliyyə axınlarına ciddi nəzarət olunarsa, korrupsiyanın qarşısını almaq mümkün olar. Şəffaflığın təmin edilməsi üçün bu cür sərt addımların atılmasına ehtiyac var”.
Respublika Alternativ partiyasının İdarə Heyətinin üzvü və iqtisadçı Natiq Cəfərli bu məsələsədə siyasi partiya liderləri ilə həmfikir olub. O da ölkədə ciddi nəzarət mexanizmlərinə ehtiyac olduğunu qeyd edib;
“Dövlət büdcəsindən ayrılan vəsaitlərin xərcləməsində qeyri-qanuni əməllərin aradan qaldırılması və şəffaflığın təmin edilməsi üçün xüsusi nəzarət sistemi qurulmalıdır. Eyni zamanda, büdcə xərcləri ilə bağlı əhaliyə ciddi məlumatlar verilməlidir. Bu da korrupsiyanın qalşısının alınması üçün uğurlu bir vasitədir”.
Milli Məclisin deputatı Aqil Abbas korrupsiya hallarının başqa dövlərin ordusunda getdiyini bildirsə də, Azərbaycan hərbisində ciddi təmizlənmələr aparılmasını zəruri hesab edib;
“Azərbaycan ordusu mütləq rüşvətxorlardan və oğrulardan təmizlənməlidir. Əgər DTX Müdafiə Nazirliyində əməliyyat aparıbsa, deməli, nəsə ciddi bir məsələ var. Lakin ordumuzda çatışmamazlıqların qarşısının alınması açıq yox, üstü örtülü şəkildə aparılmalıdır. Mətbuatda Azərbaycan ordusunun imicinə 3-4 nəfərin cinayət əməlinə görə zərər vurulmamalıdır. Azərbaycan ordusunun şərəfi qorunmalıdır”.