“Qonşular ilə münasibətlərin normallaşması Ermənistan iqtisadiyyatının inkişafı üçün ilkin priotetdir”.
Bu sözləri Ednews-a iqtisadçı Rəşad Həsənov Ermənistan müxalifətinin lideri Robert Koçaryanın Ermənistan-Türkiyə sərhədinin açılması ilə bağlı açıqlamasını şərh edərkən bildirib.
Koçaryanın açıqlamasını məntiqsiz hesab edən Rəşad Həsənov Ermənistanın rəqabət xarakterli iqtisadiyyata keçməyə ehtiyacı olduğunu vurğulayıb.
“Ermənistan iqtisadiyyatı mono-strukturlu bir iqtisadiyyatdır. Bu da müəyyən şərtlər daxilində sahibkarlığın inkişafı üçün imkanlar yaradır, amma bu sistem uzun müddət davam gətirə bilmək qabiliyyətində deyil. Ermənistan öz iqtisadiyyatını mərhələli şəkildə inkişaf etdirmək üçün rəqabətə ehtiyacı var. Bu şəraitin yaradılması üçün Ermənistan həm Azərbaycan, həm də Türkiyə ilə münasibətləri normallaşdırmalıdır. Xüsusilə, Türkiyə ilə iqtisadi münasibətlərin qurulmasından ən çox qazanan ölkə Ermənistan olacaq. Əlbəttə, Türkiyənin də Ermənistanda öz iqtisadi maraqları var, yəni Türk şirkətləri bu ölkədə öz bazarını və şəbəkəsini qurmaq üçün imkanlar əldə edə bilər. Bununla yanaşı, münasibətlərin normallaşdırılması təqdirdə, Ermənistan məhsulları Türkiyə vasitəsiylə Avropa bazarına daha asan ötürüləcək”.
Ekspert, həmçinin qeyd edib ki, Ermənistan öz istehsalat keyfiyyətlərini müasir standartlara və rəqabətə uyğunlaşdırmaq üçün Türkiyə təcrübəsindən yararlana bilər.
“Bu ölkədə xırda ticarətin inkişafında da Türkiyə öz töhvəsini verə bilər. Ermənistan və Türkiyə arasında sərhədlərin açılmasından sonra həmin bölgədə yaşayan türk və erməni əhalisi bir-biri ilə ticarət əlaqəsi quracaq, bu da sosial rifahın artmasına gətirib çıxaracaq”.
Ekspert Ermənistan iqtisadiyyatının Türkiyədən tam asılı olacağını qeyri-mümkün hesab edib.
“Ermənistan müəyyən iqtisadi sahələrdə Türkiyədən asılı ola bilər. Lakin Ermənistanın yaxın gələcəkdə Türkiyənin xarici ticarət tərəfdaşına çevrilmək imkanları da var. Bu da hər iki dövlət arasında siyasi münasibətlərin qurulmasından, o cümlədən Ermənistan hakimiyyətinin konstruktiv mövqeyindən asılıdır”.
Qeyd edək ki, Ermənistanın sabiq Prezidenti Robert Koçaryan mətbuata açıqlamasında Ermənistan-Türkiyə sərhədlərinin açılmasını Ermənistana iqtisadiyyatına mənfi təsir göstərəciyini bildirib. O, qeyd edib ki, bu, Ermənistanda problemlər yaradacaq və bundan daha çox Türkiyə faydalanacaq.
Yunis Abdullayev
