Bu gün AVRONEST Parlament Assambleyasının İqtisadi inteqrasiya, sosial məsələlər, mədəniyyət və vətəndaş cəmiyyəti komitələrinin birgə iclasında Azərbaycan nümayəndə heyətinin rəhbəri, Milli Məclisinin İqtisadi siyasət, sənaye və sahibkarlıq komitəsinin sədri Tahir Mirkişilinin müəllifi olduğu “Paytaxt şəhərlər: post COVİD-19 reallıqlarında iqtisadi inkişaf” mövzusunda sənədin müzakirəsi zamanı təxribata yol verilib.
Ednews-in xəbərinə görə, Ermənistanda Avropa Biznes Assosiasiyasının icraçı direktoru Diana Sarumovanın çıxışı zamanı nümayiş etdirilən slaydda Azərbaycanın ərazi bütövlüyünün təhrif olunduğu xəritə yer alıb.
T. Mirkişili iclasda bu təxribatla bağlı Azərbaycan nümayəndə heyətini adından bəyanat verib.
T. Mirkişili deyib ki, Diana Sarumovanın bu addımı təxribatdır: “Biz parlamentarilərik, beynəlxalq təşkilatıq. Hər kəsi beynəlxalq təşkilatın reqlamentinə riayət etməyə çağırıram. Diana Sarumovanın təqdim etdiyi slaydda xəritə göstərildi. Həmin xəritədə Azərbaycanın bir hissəsi korrekt göstərilməmişdi. Bu, təxribatdır. Mən katibliyə müraciət etmək istəyirəm ki, əvvəlcədən, slayd ekranda göstərilmədən bu təxribatın qarşısını almaq olardı. Əgər biz kimisə burada çıxışa dəvət ediriksə, bu məsələlər nəzərə alınmalı və bizə hörmətlə yanaşılmalıdır. Biz AVRONEST PA-nın üzvləriyik. Beynəlxalq hüquq normalarına, Avropa Parlamentinin normalarına, Tərəfdaşlıq Proqramının normalarına hörmətlə yanaşmalıyıq. Ona görə də sizi ehtiyatlı olmağa, bizim təşkilata qarşı təxribatları dayandırmağa çağırıram”.