Misir Ərəb Respublikasının Bakıdakı səfiri cənab Adel İbrahim, Ednews-a açıqlamasında bildirib ki, 2021-ci ilin iyununda Qahirədə iki ölkə arasında baş tutan siyasi məsləhətləşmələrdən başlayaraq və ondan sonra Azərbaycan Respublikasının Mədəniyyət Nazirinin 2021-ci il dekabrının əvvəlində Qahirəyə səfəri, onun Misirin Mədəniyyət Naziri ilə görüşü, o cümlədən Azərbaycanın nümunəvi birgəyaşayış modeli olduğunu bir daha sübut edən Əl-Əzhər Şeyxi ilə görüşü kimi son bir neçə ayda ölkələrimizin rəsmiləri arasında başlanmış silsilə görüşlər və qarşılıqlı səfərlər vasitəsilə Misir-Azərbaycan münasibətlərində əsl yüksəlişin şahidi olub.
A. İbrahim qeyd etdi ki, bundan başqa cari ilin fevral ayının əvvəlində Qafqaz Müsəlmanları İdarəsi sədrinin müavini, Azərbaycanın müftisinin rəhbərlik etdiyi nümayəndə heyəti İslam İşləri üzrə Ali Şuranın 32-ci Konfransında iştirak etmək üçün Qahirədə səfərdə olub.
Misir səfiri əlavə etdi ki, Misir-Azərbaycan İqtisadi, Elmi və Texniki Əməkdaşlıq üzrə Hökumətlərarası Birgə Komissiyanın beşinci iclasında iştirak edəcək Misir nümayəndə heyətinin rəhbəri olaraq cari ilin fevral ayının 24-dən 27-dək Misirin Beynəlxalq Əməkdaşlıq Naziri xanım Rania Al-Mashat Azərbaycanda səfərdə olacaq və Komissiyanın işi çərçivəsində keçirilən Misir-Azərbaycan Biznes Forumunda da iştirak edəcək.
Misirli diplomat onu da qeyd etdi ki, Komissiya və Forumda 60-dan çox Misirli nümayəndə iştirak edir və bu da öz növbəsində Qahirənin Azərbaycanla müxtəlif səviyyələrdə və sahələrdə ikitərəfli əlaqələrin möhkəmləndirilməsinə böyük marağının olduğunu əks etdirir.
O, həmçinin vurğuladı ki, qarşıdan gələn dövr iki ölkə arasında ikitərəfli münasibətlər səviyyəsində yeni fəaliyyətlərin şahidi olacaq. Belə ki, Azərbaycan Respublikasının Milli Məclisinin sədrinin bu ilin aprelində Misirə səfəri planlaşdırıldığını, 2022-ci ilin martında Bakı ilə Şarm Əl-Şeyx arasında birbaşa aviareys açılacağını, Covid-19 pandemiyasının yayılması səbəbindən təxirə salınan Misir Ərəb Respublikasının Prezidenti Zati-Aliləri Abdel Fattah Al Sisi cənablarının Bakıya səfərinə hazırlıq məqsədilə Misir Xarici İşlər Nazirinin Bakya gözlənilən səfəri kimi mühüm hadisələrin olacağını qeyd etdi.
