“Donbass ssenarisinin Qarabağda tətbiq olunması praktiki baxımdan mümkün deyil”.

Bu sözləri Ednews-a politoloq Zərdüşt Əlizadə Rusiyanın qondarma "Donetsk" və "Luqansk" rejimlərinin tanımasını və bunun Qarabağ məsələsinə təsirini şərh edərkən bildirib.

“Ukraynanın Donbass bölgəsində rus separatçılarına Rusiya dəstək verir. Qarabağda erməni separatçılarına nəinki Rusiya, heç bir dövlət də dəstək göstərmir. Rusiya sülhməramlı qüvvələrinin müvəqqəti yerləşdiyi ərazilərdə erməni separatçıları girov kimi saxlanılır. Rusiya onlardan bölgə üzərinə nəzarət etmək üçün istifadə edir. Yalnız Azərbaycanın Rusiyaya düşmən münasibəti bəslədiyi halda, Kreml Qarabağda Gürcüstan və Ukrayna ssenarisini təkrarlaya bilər. Lakin Azərbaycan hakimiyyəti qonşuları ilə münasibətdə düzgün və rasional siyasət yürüdür. Rusiyaya arxasını çevirmir və Rusiyanın geosiyasi rəqiblərinin müttəfiqi olmur”.  

Z. Əlizadə bəzi politoloqlardan fərqli olaraq, erməni separatçılarının Qarabağda sülhməramlılar və Azərbaycan ordusu arasında təxribat törətməyə cəhd edəcəklərini yalnış fikir hesab edib.

“Erməni separatçıları heç kimdirlər. Onların Rusiya sülhməramlı qüvvələrinə təsir etmək imkanları yoxdur”.

Zərdüşt Əlizadə Azərbaycan və Rusiya dövlət rəhbərlərinin imzaladığı Qarşılıqlı Müttəfiqlik Bəyanatına da münasibət bildirib. O, qeyd edib ki, Rusiya və Azərbaycan arasında səmimi müttəfiqlik regional təhlükəsizliyin təmin olunmasına əhəmiyyətli dərəcədə təsir edəcək.

“Bəyannaməyə əsasən, Rusiya və Azərbaycan regionda sülhün və sabitliyin töhfəsi üçün bir-biri ilə daha da güclü münasibət quracaqlar. Hər iki ölkə bir-birinin təhlükəsizliyinə təhdid göstərməyəcək. Onu da qeyd edim ki, Azərbaycan Ermənistana nisbətən siyasi və iqtisadi müttəfiqlik baxımdan Rusiyaya daha yaxın ölkədir”.  

Yunis Abdullayev