“Avropa İttifaqı Cənubi Qafqazda sülhün və sabitliyin bərqərar olunmasında maraqlıdır. Ancaq ittifaq bunun həyata keçməsi üçün ciddi tədbirlər görməlidir”.
Bu sözləri Ednews-a siyasi şərhçi Tofiq Abbasov bu gün Avropa İttifaqı Şurasının Prezidenti Şarl Mişelin vasitəçiliyi ilə Azərbaycan Prezidenti İlham Əliyev və Ermənistan Baş naziri Nikol Paşinyan arasında Brüsseldə təşkil olunacaq görüşü şərh edərkən bildirib.
Söhbət zamanı o, qeyd edib ki, Avropa İttifaqı Qafqaz bölgəsində öz siyasi və iqtisadi mövqeyini gücləndirmək niyyətindədir.
“Bir neçə ay əvvəl Brüsseldə Avropa İttifaqının yüksək rəsmisi Şarl Mişel və Fransa Prezidenti Emmanuel Makronun vasitəçiliyi ilə hər iki dövlətin rəhbəri arasında keçirilmiş görüşdə bir sıra önəmli məsələlər müzakirə olunub. Bu məsələlər birbaşa Cənubi Qafqazda növbəti qarşıdurmanın qarşısının alınması və əmin-amanlığın bərqərar olunmasıdır. Bildiyimiz kimi, Avropa İttifaqı regionun üç ölkəsi ilə həm ikitərəfli münasibətlər, həm də şərqtərəfdaşlığı formatında əməkdaşlığı daha da gücləndirməyə çalışır”.
Politoloq Avropa İttifaqının Cənubi Qafqaz siyasətində Azərbaycanın xüsusi rola malik olduğunu qeyd edib.
“Avropa rəsmiləri Azərbaycanın regionda siyasi, iqtisadi və hərbi cəhətdən yüksək potensiala malik olduğunu bilirlər. Həmçinin Azərbaycanın da Avropa İttifaqı ilə bərabərhüquqlu münasibətləri var. İttifaqın iki aparıcı ölkəsi - Fransa və Almaniya Azərbaycanın baxışlarına və yanaşmalarına hörmət edirlər. Onlar Azərbaycanın regional sabitliyin və təhlükəsizliyin təmin olunmasında əhəmiyyətli rol oynadığını anlayırlar”.
Tofiq Abbasov Avropa İttifaqının regionda sülhün və sabitliyin təmin edilməsi üçün Ermənistana təzyiqlərin artırılmasının vacibliyini vurğulayıb.
“Sülh prosesində süründürməçilik edən, hətta təxribatlara əl atan Ermənistanındır. Avropa İttifaqı və onun üzv dövlətləri bu dövlətə uğursuz maneverlərə son qoymağı və danışıqlarda daha ciddi mövqe tutmağı tələb etməlidirlər. Ermənistan boş vədlər vermək əvəzinə özünü sülh müqaviləsinin imzalanmasına hazırlamalıdır. Qərb ölkələri bu məsələdə Ermənistana kömək etməlidirlər. Növbəti görüşdə sülh prosesi ilə bağlı yeni parametrlərin və konfiqurasiyanın müzakirə ediləcəyi gözlənilir. Azərbaycan bu görüşdə də öz mövqeyini ortalığa qoyacaq”.
Yunis Abdullayev