Azərbaycanda milli azlıqların malik olduğu vətəndaş hüquqları Qarabağda yaşayan yerli ermənilərə də şamil edilə bilər.
Bu sözləri Ednews-a Milli Məclisin deputatı Azay Quliyev yaxın gələcəkdə Xankəndidə yaşayan erməni əsilli Azərbaycan vətəndaşının Milli Məclisə deputat seçilmək hüququnu şərh edərkən bildirib.
O, bildirib ki, Azərbaycanda yaşamaq istəyən ermənilər ölkə konstitusiyasını və qanunlarını qəbul etməlidirlər.
“Xankəndi, Xocəvənd və Qarabağın digər bölgələrinda yaşayan yerli ermənilərə ölkəmizin ərazi bütövlüyünə və suverenliyinə hörmət etdiyi təqdirdə onlara vətəndaşlıq verilə bilər. Azərbaycan konstitusiyasına görə, ölkəmizdə yaşayan milli azlıqlar seçkilərdə iştirak etmək və seçmək hüququna malikdirlər. Onlara qarşı heç bir ayrı-seçkilik müşahidə olunmur. Gələcəkdə Azərbaycan vətəndaşı Qarabağ erməniləri də bu hüquqlardan istifadə edə bilərlər. Bunun üçün ilk növbədə bütün Qarabağ üzərində Azərbaycanın suverenliyi bərpa olunmalıdır, sonra isə öz doğma torpaqlarından zorla çıxarılan azərbaycanlılar Xankəndiyə, Xocalıya və Xocəvəndə qayıdıb yenidən məskunlaşmalıdır. Bunun baş verdiyi təqdirdə o torpaqlarda yaşayan ermənilərin və azərbaycanlıların seçmək və seçilmək hüququndan danışmaq olar”.
Məsələyə münasibət bildirən politoloq Zərdüşt Əlizadənin sözlərinə görə isə Azərbaycanda etnik xalqlarla bərabər Qarabağ ermənilərinə də vətəndaşlıq hüquqları verilə bilər.
“Azərbaycan vətəndaşı olan erməni millətinə nə üçün vətəndaşlıq hüquqları verilməsin? Onlar seçkilərdə iştirak etmək və seçmək hüquqlarına nə üçün malik olmasınlar? Millətçilik etmək lazım deyil. İstər erməniyə, istərsə də hər hansı millətə ayrı-seçkilik etmək konstitusiyanın pozulması deməkdir. Azərbaycan vətəndaşları ilə bərabər Qarabağ erməniləri də bütün hüquqlardan və azadlıqlardan istifadə etməlidir”.
Qeyd edək ki, deputat Elman Məmmədov yaxın gələcəkdə Xankəndidə yaşayan Azərbaycan vətəndaşı olan ermənilərin parlamentdə deputat seçilmə hüququnun verilməsini yalnış hesab edib.
O, bildirib ki, Ermənistanda bir dənə də olsun azərbaycanlının yaşamadığı təqdirdə ermənilərin də Azərbaycanda yaşamağa, parlamentdə təmsil olunmağa haqqı yoxdur.