Lavrovu Bakıya gətirən SƏBƏBLƏR - Səfərin PƏRDƏARXASI MƏQAMLARI - ednews.net

26 İyun,

(+994 50) 229-39-11

Lavrovu Bakıya gətirən SƏBƏBLƏR - Səfərin PƏRDƏARXASI MƏQAMLARI

Siyasət A- A A+
“Azərbaycan rəhbərliyi Lavrovun diqqətinə ölkəmiz üçün qırmızı xətt hesab olunan məsələləri çatdıracaq”. 
 
Bu sözləri politoloq Zaur Məmmədov Rusiya Xarici İşlər Naziri Serqey Lavrovun Azərbaycana gözlənilən rəsmi səfərinin pərdəarxası məqamlardan danışarkən deyib.
 
Siyasi şərhçi Ednews - a açıqlamasında XİN başçısının səfəri çərçivəsində iki dövlətin rəsmilərinin Cənubi Qafqazda hazırki prosesləri müzakirə etməsi ehtimalından söz açıb. 
 
“Rusiya XİN rəhbəri Serqey Lavrovun Türkiyə və Ermənistandan sonra Azərbaycana səfər planlaşdırması gözlənilən idi. Bu səfər həm Moskva, həm də Bakı üçün çox önəmlidir. Keçiriləcək görüşlərdə Qarabağ məsələsi ilə yanaşı Azərbaycan-Ermənistan sərhədlərinin delimitasiyası, Bakı və İrəvan arasında sülh prosesinə aid olan məsələlərə toxunalacaq. Eyni zamanda Rusiyanın baş diplomatının səfər gündəliyində Ukrayna müharibəsi fonunda Rusiya-Azərbaycan münasibətləri, eləcə də Azərbaycan vasitəsi ilə öz siyasi və iqtisadi maraqlarını təmin etmək kimi məsələlər də əsas yer tutur”. 
 
Zaur Məmmədovun sözlərinə görə, Rusiyaya tətbiq olunan son sanksiyalar və bu ölkəyə qarşı formalaşan siyasi blok Moskvanı xarici siyasətində müəyyən dəyişikliklər etməyə vadar edib.  
 
“Lavrovun Azərbaycanın rəsmiləri ilə görüşlərdə Cənubi Qafqazda Rusiya-ABŞ qarşıdurması ilə bağlı Moskvanın maraqlarını və istəklərini Bakının nəzərinə çatdırması gözlənilə bilər. Bununla bərabər, Azərbaycan rəhbərliyi də öz növbəsində öz strateji maraqları üçün önəmli olan məsələləri, yəni Zəngəzur dəhlizi, sərhədlərin delimitasiyası və müəyyən qüvvələrin bölgədə sülh prosesinə xələl gətirən davranışları ilə bağlı narahatlığını qaldıra bilər.  Hesab edirəm ki, indiki halda Ukrayna müharibəsi ətrafında baş verən hadisələr Rusiyanı qonşu dövlətlər ilə münasibətlərdə fərqli davranmaq məcburiyyəti qarşısında qoyur”. 
 
Sonda Z.Məmmədov Moskva və Ankara arasında bir çox məsələlər ilə bağlı yol xəritələrinin cızıldığını vurğulayıb. 
 
“Bu yol xəritələri üzərində Ankara, Bakı və Moskva arasında müəyyən anlaşmalar gözlənilə bilər. Eyni zamanda Azərbaycan Moskvanın Ermənistana təzyiqlər etməsini,  bəzi məsələlərin Azərbaycanın xeyrinə həll etməsini istəyir”.   
 
Qeyd edək ki, Rusiya Xarici İşlər naziri Serqey Lavrovun iyunun 23-24-də Azərbaycana rəsmi səfəri gözlənilir.
 
Yunis Abdullayev

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...