Deputat Sabir Rüstəmxanlı Milli Məclisin keçirilən növbədənkənar iclasında Qarabağla bağlı yeni təklif irəli sürüb. Belə ki, millət vəkili çıxışı zamanı işğaldan azad olunan ərazilərin bərpasında imkanlı iş adamlarının cəlb olunmasını dilə gətirib.
“Bizim milyonçu iş adamlarımız var. Bu gün Qarabağın bərpasına yardım etmirlərsə, onların milyonlarının, milyardlarının nə önəmi var? Bütün Azərbaycanı sevən qüvvələr bu işə cəlb olunmalıdır”,- deyə deputat qeyd edib.
Parlament nümayəndəsinin bu çağırışı ilə bağlı AĞ Partiya başqanı Tural Abbaslı Ednews-a danışarkən bildirib ki, bununla bağlı dövlət proqramı qəbul olumalıdır.
“Bildiyim qədər həmin ərazilərdə kifayət qədər imkanlı insanlarımız var, lakin bütün günahların onlarda olduğunu düşünmürəm. Çünki bununla bağlı proqram qəbul olunmayıb, dövlət mexanizmi, hər hansı layihə və ya format yoxdur. Doğrudur, “Qarabağ Dirçəliş Fondu” var, amma bunu ancaq insanların vətənpərvərlik emosiyaları ilə yükləmək olmaz. İş adamı da öz xeyrini düşünməlidir”.
Partiya sədri qeyd edib ki, azad olunan ərazilərdə erməni vandallarının törətdikləri vəhşilikləri təkcə, dövlətin daxili resurları ilə bərpa etmək mümkün deyil.
“Bu illərlə davam edə bilər. O baxımdan düşünürəm ki, ilk olaraq, Milli Məclis vəziyyətlə bağlı qanun qəbul etməlidir, bundan sonra iş adamları bu sahəyə öz töhfəsini verə bilərlər”.
Müsavat partiyasının başqanı Arif Hacılı isə bildirib ki, bəzi məmurlar ölkədə bütün sahələrdə monopoliya yaradıb, bu da həmin ərazilərə investisiya yatırmaq baxımdan şəraitin yaradılmasına mane olur.
“Hər bir vətəndaşın Qarabağın işğaldan azad edilməsində rolu, bu müharibədə itkisi var. 30 il məşəqqətli həyat yaşamış məcburi köçkün əhali indi bundan faydalanmalıdır. Azərbaycan xalqına bu işdə iştirak etmək üçün yardım göstərilməli, kredit ayrılmalıdır. Bundan sonra təbii olaraq yerli sərmayəçilərin də orada iş qurmaq, bərpa işlərində iştirak etmək, məskunlaşma işinə yardım etmək imkanı olacaq”.
Azərbaycan Xalq Partiyasının sədri Pənah Hüseyn isə Sabir Rüstəmxanlının bu çağırışını məqsədəuyğun və haqlı hesab edib.
“Özünü azərbaycanlı sayan hər bir şəxs Qarabağın bərpasına kömək etməlidir. Bu sərbəst və könüllü olmalıdır”.
Müasir Müsavat Partiyasının sədri Hafiz Hacıyev millət vəkilinin fikirlərini müsbət dəyərləndirib. O, hətta korrupsioner məmurların siyahıya alınmasını da təklif edib.
“Onlar Azərbaycan xalqından oğurladıqları pulun 30 faizini Qarabağın bərpasına sərf etsələr, əlbəttə, dövlətimizin yükü azalar. Bu məmurların əksəriyyəti dövlət büdcəsini talan edib, xaricdə milyardları var. Tutulan İcra başçılarının hərəsinin milyonlarla varidatı və 20-30 villası var. Bu Azərbaycan xalqının puludur, Qarabağın bərpasında istifadə olunmalıdır. Biz də bu təklifə ideoloji siyasi baxımdan dayaq olarıq”.
Gülnar Səlimova