Azərbaycan ordusunun öz ərazisində qeyri-qanuni erməni silahlı birləşmələrinə qarşı “Qisas” adlı anti-terror əməliyyatı keçirib.
Azərbaycan ordusunun bu uğurlu hərbi əməliyyatını təqdirəlayiq görən bir çox siyasi partiya liderləri hər zaman bu kimi zəruri əməliyyatların aparılmasında ordumuzun yanında olduqlarını, Qarabağ məsələsində dövlətlə həmrəylik nümayiş etdirdiklərini bildiriblər.
Müsavat partiyasının sədri Arif Hacılı Ednews –a açıqlamasında bildirib ki, Azərbaycan ordusu heç zaman hər hansı silahlı birləşmələrin ölkəmizin suverenliyinə təhdid etməsinə imkan verə bilməz.
“Azərbaycan ərazisində heç bir ölkənin silahlı birləşmələri ola bilməz. Əgər sülhməramlı qüvvələr qeyri-qanuni erməni silahlı birləşmələrini 10 noyabr sazişinə uyğun olaraq ərazimizdən çıxartmırsa, onda Azərbaycan ordusunun vəzifəsidir ki, bu silahlı birləşmələri sıradan çıxartsın və torpaqlarımızdan təmizləsin. Bu baxımdan ordumuzun addımları beynəlxalq hüququn normalarına uyğundur, eyni zamanda ədalət prinsipinə əsasən tamamilə düzgündür. Heç kəs ölkəmizin ərazi bütövlüyünə təhdid elə bilməz”.
Azərbaycan Milli Dirçəliş Partiyasının sədri Fərəc Quliyev hesab edib ki, Azərbaycan ordusu Qarabağda bu kimi anti-terror əməliyyatlarını davam etdirməlidir.
“44 günlük Vətən müharibəsindən sonra imzalanan üçtərəfli 10 noyabr bəyanatının 4-cü maddəsində qeyd olunur ki, sülhməramlı adı altında rus qoşunlarının Qarabağa daxil olması ilə paralel Ermənistanın silahlı birləşmələri oradan çıxmalıdır. Təəssüflər olsun ki, bu günə qədər erməni silahlı birləşmələri öz ərazimizdən çıxarılmayıb, Rusiya və Ermənistan üzərinə düşən öhdəlikləri yerinə yetirməyib. Azərbaycan rəhbərliyi Xarici işlər, Müdafiə nazirliyi səviyyəsində, eyni zamanda Prezidentin son müşavirələrində bildirilib ki, Qarabağda qanunsuz erməni silahlı birləşmələri təhdid törədirlər, onlar oradan çıxmalıdırlar. Azərbaycan ordusu öz ərazisində anti-terror əməliyyatları keçirməyə məcburdur. Sonuncu erməni silahlısı torpaqlarımızdan çıxana qədər bu əməliyyatlar davam etməlidir. Azərbaycan 10 noyabr bəyanatının öhdəliklərinin yerinə yetirilməsini tələb edirik. Əgər könüllü şəkildə etmək istəmirlərsə, onları məcburi şəkildə ərazimizdən çıxardacağıq. Bizim partiyamız atılan son addımları dəstəkləyir və Azərbaycan ordusunun, Ali Baş Komandamızın yanındayıq”.
Ağ Partiyanın sədri Tural Abbaslı onun sədrlik etdiyi partiya Azərbaycanın ərazi bütövlüyü istiqamətində atılan bütün siyasi, hərbi və diplomatik addımları dəstəklədiyini bildirib.
“Əsgərimizin şəhid olmasının cavabı verilməli idi. Azərbaycan öz gücünü göstərməli, həmin ərazilərin kimə məxsus olduğunu sübut etməlidir. Biz görürük ki, öz ərazilərimizdə Rusiya və Ermənistan bizə qarşı fəaliyyət göstərir, qanunsuz birləşmələr orada möhkəmlənməyə çalışırlar, yenidən səngərlər qazırlar, silahlar daşıyırlar. Biz də bunlara sakit şəkildə göz yuma bilmərik. Dünyanın heç bir ölkəsi öz qanuni ərazisində terrorçuların güclənməsinə imkan vermir. Bu əməliyyatlar Xankəndinə kimi davam etməlidir. Respublika Prokurorluğun cinayət qaldırdığı və axtarışda olan qondarma rejimin rəhbəri Arayik Arutyunyanın qulağından tutub Bakıya gətirmək lazımdır”.
Milli Dirçəliş Partiyasının sədri Nemət Pənahlı qeyd edib ki, gec-tez Qarabağda anti-terror əməliyyatları keçirilməli idi.
“Torpaqlarımızı erməni terrorçu ünsürlərdən təmizləmək Azərbaycan ordusunun haqqıdır, müqəddəs vəzifəsidir. Orumuzun qalibiyyəti millətimizin və dövlətimizin Zəfəridir. Biz hər zaman dövlətimizin və ordumuzun yanındayıq, bundan sonra da olacağıq”.
Azərbaycan Kommunist Partiyasının sədri Rauf Qurbanov Qarabağda baş verən hadisələrlə əlaqədar olaraq partiyasının Ali Baş komandanın mövqeyini dəstəklədiyini bildirib. Partiya sədri hesab edir ki, Qarabağda erməni separatçılarına qarşı aparılan hərbi əməliyyatlar ordumuzun mühüm uğurudur, təqdirəlayiqdir, ən əsası bu əməliyyatlar erməni silahlı birləşmələrinin tör-töküntələri çıxarılana qədər davam etməlidir.
Yunis Abdullayev