Azərbaycanın Böyük Britaniya və Şimali İranladiya Birləşmiş Krallığındakı səfirliyi bir qrup radikal dini dəstənin hücumuna məruz qalıb.
Mətbuat hücumun məsuliyyətini şiə ekstremist təşkilatı olan "Mehdi Qulluqçuları Birliyi" - Küveytdən olan mühacirlər öz üzərinə götürdüyünü yayıb.
Amma bəzi ekspertlər bu iddiaları təkzib edir. Onların fikrincə, hadisə ilə bağlı bir çox müəmmalı məqamlar var.
Məsələ ilə bağlı politoloq Soltan Sədrəddin Ednews - a bildirib ki, həmin təşkilat 2018-ci ildə Londonda İran İslam Respublikasının səfirliyinə də hücum edib.
“Bu qruplaşma İranda mövcud rejimin rəhbəri Ayətullah Seyid Əli Xameneiyə və rejimin digər üləmalarına qarşı kəskin bəyanatlar səsləndirən təşkilat kimi tanınır. Düzdür, qruplaşmanın rəhbəri Yasir Əl-Həbibi Qumda dini təhsilini davam etdirib, oradakı üləmalardan təsirlənib, özünü onların davamçısı hesab edir. Amma bu şəxs İranda rejimin başçılarına qarşıdır, onların siyasətini qəbul etmir. Bu baxımdan qrupun İranyönümlü olması ilə bağlı ciddi bir məlumat yoxdur, hətta bu barədə fikirlər səsləndirmək əsassızdır”.
Milli Məclisin deputatı, Azərbaycan Quruluş Partiyasının sədri Fazil Mustafa da eyni fikirləri bölüşüb. Lakin o, Azərbaycanda İran agenturasına xidmət edən dini şəbəkələrin mövcudluğunu istisna etməyib.
“Konkret olaraq təşkilatın İran rəhbərliyinin əmri ilə hərəkət etməsini sübut edən bir dəlil, fakt yoxdur. Bu kimi təşkilatların kim ilə bağlı olduqlarını öyrənməyə çalışarkən, hadisənin baş verməsində ingilis xüsusi xidmət orqanlarının əli olması ehtimalını da nəzərə almaq lazımdır. Bunu mütləq araşdırmaq lazımdır. Sakit tərzdə və heç bir müdaxilə ilə rastlaşmadan durub səfirliyin binasını zəbt etmək heç bir güclü dövlətin imicinə yaraşmır. Açığı desək, bunun heç bir məntiqi izahı yoxdur. Necə ola bilər ki, Britaniyanın xüsusi xidmət orqanlarının bu hücumun təşkilindən xəbərləri olmasın? Bu çox ciddi narahatedici hadisədir, bizim ölkəyə bir xəbərdarlıqdır”.
Deputat “Mehdi Qulluqçuları Birliyi”nin addımını ölkəmizdə radikal şiə qruplaşmalarına dəstək nümayiş etdirmək kimi qiymətləndirib.
“Təbii ki, Azərbaycanda İran agenturasına xidmət eləyən qruplaşmalar var. Onların ideologiyası və düşüncəsi ölkəmizin təhlükəsizliyinə təhdidlər törədir. Ekstremist dini cərəyanlara qarşı mübarizə təkcə hüquq-mühafizə səviyyəsində yox, həmçinin ideoloji zəmində də aparılmalıdır. Təəssüf ki, cəmiyyətimizdə ideoloji və dini hazırlığı olan qüvvələrin azlığı bu prosesdə uğur qazanmağa imkan vermir. Azərbaycanın bəzi bölgələri dövlətimizin əleyhinə dini qüvvələrin mərkəzinə çevrilib, ölkəmizdə bu zehniyyətə sahib olan kifayət qədər insanın olduğuna müşahidə edirik”.
Digər həmkarlarından fərqli olaraq, politoloq Cümşüd Nuriyev Londonda Azərbaycan səfirliyinə təşkil olunan hücumda məhz İran rejiminin üsnürlərinin əlinin olduğunu bildirib.
“İran regionda öz mövqeyini möhkəmləndirməkdən ötrü öz maraqlarına uyğun şiəliyi ixrac etməklə Körfəz ölkələrində bu kimi təşkilatlar yaradıb. Bu hücumu təşkil etməkdə əsas məqsəd İran Azərbaycana göstərmək istəyir ki, biz güclü dövlətik, siz bizimlə hesablaşmalısınız. İranın atdığı addımlar son vaxtlar Azərbaycan mediasında yüksək səviyyədə işıqlandırılır, bu isə İran daxilində təşviş yaradır. Cənublu soydaşlarımızın verdiyi məlumatlara görə, İran məmurları həddən artıq narahatlıq keçirirlər ki, Azərbaycan ziyalıları və jurnalistləri İranda yaşayan azərbaycanlıların hüquqlarını müdafiə edirlər. Ona görə də onlar belə ucuz işlərə əl atırlar. Onların bu hərəkətləri nə islama, nə də müsəlmançılığa yaraşır. İranın yürütdüyü siyasət sırf islamın əleyhinədir, islami dəyərlərlə uzlaşmır. Heç bir qüvvə Azərbaycanı öz yolundan döndərə bilməyəcəklər. Əksinə, bu kimi hallar ölkəmizi daha da rasional və düzgün addımlar atmağa vadar edəcək”.
Qeyd edək ki, 2004-ci ildə Londonda əsası qoyulan “Mehdi Qulluqçuları Birliyi” İran hökumətinə qarşı düşmənçiliyi ilə seçilir. Həmçinin, Yaser Əl-Həbibi İranın Ali Dini Rəhbəri Əli Xamneneyinin dini etimadnaməsini də qəbul etmir.
2018-ci il martın 10-da dəyənək və xəncərlərlə silahlanmış qrupun 4 üzvü Hüseyn Əlinin həbsinə etiraz olaraq İranın Londondakı səfirliyinə hücum ediblər.
