İran rəhbərliyi Ermənistanın küyünə getməsə yaxşıdır - Politoloq Rəisinin narahatlığından DANIŞDI - ednews.net

27 Sentyabr, Çərşənbə axşamı

(+994 50) 229-39-11

İran rəhbərliyi Ermənistanın küyünə getməsə yaxşıdır - Politoloq Rəisinin narahatlığından DANIŞDI

Siyasət A- A A+

“İran hakimiyyəti zənn edir ki, Azərbaycan öz tarixi torpaqlarını Ermənistandan geri almaq niyyətindədir. Halbuki bu kökündən yanlış düşüncədir”.  

Bu sözləri Ednews- a açıqlamasında politoloq Sədrəddin Soltan bildirib. 

İran Prezidenti Ebrahim Rəisinin Ermənistanın Baş naziri Nikol Paşinyanla son telefon danışığında Cənubi Qafqazın geosiyasi xəritəsinin dəyişməsi narahatlığını şərh edən Sədrəddin Soltan qeyd edib ki, rəsmi Tehran Ermənistan və onun havadarlarının təbliğatına uymaqda davam edir. 

“İran hakimiyyəti müstəqilliyimizi bərpa etdikdən sonra ölkəmizin inkişafına hər zaman qarşı olub. Bu ölkənin rəhbərliyi Azərbaycanın regionda tutduğu mövqedən hər zaman narahatlıq keçirib. Bununla bərabər, Ermənistanın Azərbaycan torpaqlarını işğal altında saxlaması İran hakimiyyətinə bir sıra məqamlardan sərf eləyib. İndi isə Azərbaycanın torplaqları erməni işğalından azad edilib, regionda geosiyasi vəziyyət dəyişib. Azərbaycan bundan sonra da siyasi, iqtisadi və hərbi cəhətdən inkişaf edəcək, Qərb ölkələri ilə çoxşaxəli münasibətlərdə daha da ciddi adımlar atılacaq. Bütün bunlar İranın nəzərindən qaçmır. Ona görə də müxtəlif bəhanələrlə Azərbaycanın bu istiqamətdə inkişafına ləkələr yağdırmaqdan, manelər törətməkdən çəkinmir”.  

Politoloqun sözlərinə görə, Azərbaycanın öz tarixi torpaqlarını öz adları – Yerevanı,  Vardenisi, Suniki İrəvan, Göyçə və Zəngəzur adlandırması rəsmi Tehran tərəfindən xoş qarşılanmır.  

“İran rəhbərliyi hesab edir ki, guya Azərbaycan Zəngəzuru və Göyçəni Ermənistandan geri almaq niyyətindədir. Guya Azərbaycan regionda Ermənistanı yoxa çıxarmağa çalışacaq. Belə bir düşüncə tamamilə kökündən yanlışdır. İran hakimiyyəti, o cümlədən İran Pezidenti Ebrahim Rəisi ermənilərin və onun havadarlarının yalanlarına və küyünə uyurlar. Azərbaycan heç vaxt qonşu dövlətlərə qarşı ərazi iddiları irəli sürməyib. İran Prezidenti Azərbaycan-Ermənistan münasibətlərinə öz prizmasından baxır, öz meyarları ilə ölçür. Eyni zamanda İranın ali rəhbəri Seyid Əli Xamenei də deyir ki, heç kəs İran və Ermənistan arasında tarixi yolu bağlaya bilməz. Həqiqətdə isə regionda kimsə nə yolu bağlamağa, nə də regionun xəritəsini dəyişməyə çalışır. Regionda vaxtı ilə xəritənin dəyişməsinə çalışan yeganə dövlət Ermənistan olub. Ermənistan elə bir dövlətdir ki, Azərbaycana və Türkiyəyə, hətta İrana və Gürcüstana qarşı da ərazi iddiaları ilə çıxış edir”. 

Sonda S. Soltan qeyd edib ki, İran Azərbaycana qarşı beynəlxalq təzyiqlərin artması üçün hər fürsətdən istifadə etməyə çalışır. 

“Azərbaycanın kimsənin ərazisində gözü yoxdur, kimsənin torpağını tutmaq niyyətində deyil, hətta öz tarixi torpaqlarını öz ərazisinə qatmaq fikri güdmür. Əksinə ölkəmiz regionun inkişafına və sabitliyinə doğru aparan gələcək planlar - azad edilən torpaqlarda quruculuq işləri və məcburi köçkünlərin öz doğma torpaqlarına qayıtması, Ermənistanla sərhədlərin delimitasiyası, Zəngəzur dəhlizinin açılması üzərində işləyir. Rəsmi Bakı bu kimi ciddi və zəruri tədbirlərin görülməsinə diqqətini ayırır”. 

Qeyd edək ki, İran Prezidenti Ebrahim Rəisi Ermənistan Baş naziri Nikol Paşinyanla telefon danışı aparıb. O, telefon danışığında Paşinyana İranın heç bir şəkildə regionda geosiyasi xəritənin dəyişikliyini qəbul etməyəcəyini bildirib.

 

Yunis Abdullayev



Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...