“Azərbaycan Prezidenti İlham Əliyev 1988-ci ildən sonra Ermənistanda yaşayış məntəqələrini və evlərini məcburi tərk etmiş azərbaycanlıların geri qaytarılmasını qarşısına dəqiq vəzifə qoyub və artıq bu əməliyyatı ardıcıl surətdə həyata keçirir”.
Bu sözləri Ermənistanda Məhkəmə özbaşınalığına qarşı təşkilatının icraçı direktoru Larisa Alaverdinyan Pastinfor TV-in efirində deyib.
Onun sözlərinə görə, Ermənistanın bütün bölgələrində azərbaycanlıların yaşaması real faktdır, eləcə də qeyd edib ki, mövcud geosiyasi vəziyyətin Bakının xeyrinə dəyişməsi reallığı ilə barışmaqdan başqa yol yoxdur.
34 il əvvəl Zəngəzurda, xüsusən də Ağudi kəndində yaşayan azərbaycanlılarla söhbətini xatırladan Alaverdyan bildirib ki, buna şərait yaradılarsa, onlar bura qayıda bilərlər.
Alaverdinyanın bu sözlərini hər iki dövlət – Azərbaycan və Ermənistan arasında sülhün və barışığın təmin olunmasına istiqamətlənən müsbət mövqe hesab etmək olar, amma bəzi ekspertlər erməni ictimai xadiminin açıqlamasını qeyri-ciddi hesab edirlər.
Politoloq Zərdüşt Əlizadə Ednews-a a açıqlamasında qeyd edib ki, azərbaycanlıların Ermənistana qayıtması, eyni zamanda vaxtı ilə Bakı, Sumqayıt və Gəncədə yaşamış ermənilərin Azərbaycana qayıtması nəzəri baxımdan müsbət görünsə də, hələ ki qeyri-mümkündür.
“Hesab etmirəm ki, Ermənistandan qovulan azərbaycanlıların qayıtması üçün bu ölkədə şərait yaradılacaq və ya yenidən yaşamasına imkan veriləcək. İlk növbədə nəzərə almaq lazımdır ki, bu hadisələrin üstündən uzun müddət zaman keçib və bu dövr ərzində Ermənistandan köçən azərbaycanlıların arasından xeyli insan bu dünyadan köçüb gedib, bir qismi isə Azərbaycanda uyğun, şərait qurublar, öz həyatlarını sürdürürlər. Ermənistanda yenidən həyat və şərait qurmaq onlar üçün çətin olar, heç bu mümkün də deyil. İkincisi ermənilər yenidən azərbaycanlıları öz ölkəsində görmək istəməz. Sülhsevər ermənilər belə azərbaycanlıların Ermənistana qayıtması üçün heç nə edə bilməzlər”.
Deputat Asim Mollazadənin sözlərinə görə isə bu məsələ hələ ki, Azərbaycan hökumətinin gündəmində deyil.
“Hazırda Azərbaycanın qarşısında əsas hədəflər Ermənistanı sülh müqaviləsi imzalamağa məcbur etmək, sərhədlərin delimitasiyası və demarkasiyasını təşkil etmək, kommunikasiyaların açılması və bərqərar olunmasını həyata keçirməkdir. İlkin olaraq regionda sülhün və sabitliyin möhkəmlənməsi ölkəmiz üçün əhəmiyyətlidir. Bu məsələlər öz həllini tapdıqdan sonra azərbaycanlıları öz doğma torpaqları – İrəvana, Göyçəyə və Zəngəzura qayıtması məsələsini qaldırmaq olar”.
Yunis Abdullayev