Rusiya Ukraynaya qarşı müharibənin ikinci mərhələsinə qədəm qoymağa hazırlaşır. Bu məqsədilə hətta ölkədə 195 min rubl, yəni təxminən 3,150 ABŞ dolları birdəfəlik ödəniş əsasında hərbi səfərbərlik elan edilib. Etibarlı informasiya mənbələrində ötən gün Rusiya prezidenti Vladimir Putinin bu barədə fərman imzaladığı da deyilir.
Rusiyada hərbi səfərbərlik haqqında sentyabrın 21-də qərar verilib və görünür bu dəfə rəsmi Kreml yaranan bəzi narazılıqlar və ordudan yayınma hallarının qarşısını almaq üçün yeni bir metoda da əl atıb. Bu taktika qismən Qərbin, yəni NATO-nun yansıdılması olsa da, yenə də Sovet sisteminin paslanmış qaydalarını özündə əks etdirir. Məsələn, ABŞ ordusunda ən aşağı hərbi rütbəli qulluqçulara illik 25 min, yüksək rütbəli zabitlərə isə 93 min 400 ABŞ dolları məbləğində ödəniş edilir. Rusiya isə bu metodunda sanki tələdə şikar üçün yem qoymuş kimi görünür - bir dəfə ödəməklə bir cana birdəfəlik son qoyur.
Bəs Qərb buna necə reaksiya verir?
Rusiyadan gələn həyəcan verici dalğa ilk növbədə Ukraynanın şimal qonşusu olan Polşanı təsirləndirib. Belə ki, ölkə daxilində həyəcan təbili çalan Polşa sıravi vətəndaşları hərbi təlimlərə cəlb edib. Ölkə rəhbərliyi bu haqda açıqlama verərək qeyd edib ki, hazırlıq 2023-cü ildə Rusiyanın növbəti atacağı hücum addımlarına qarşı bir qabaqlayıcı təlim məqsədi daşıyır.
Baş verənlərlə bağlı Ukrayna Milli Strateji Araşdırmalar İnstitutunun eksperti Vitali Yarmolenko Ednews-a bəzi açıqlamalar verib. O, bu kimi təlimlərin nəinki Polşada, hətta digər şərqi Avropa ölkələrində tətbiq olunduğunu vurğulayıb.
“Mərkəzi və Şərqi Avropa ölkələrinin əksəriyyəti öz təhlükəsizliyini və xüsusilə Rusiyadan gələcək təhlükəni labüd hesab edir. Bu sırada Baltikyanı ölkələr və Rumıniya fəal şəkildə səfərbərlik potensialını, silah alışını artırmağa çalışır. Məsələn, Latviya son günlərdə hərbi xidmətə çağırışa yenidən baxıb.
Polşaya gəlincə, ölkə 2014-cü ildən fəal şəkildə müdafiə qabiliyyətini artırır. Rusiyanın Ukraynaya genişmiqyaslı müdaxiləsi Polşa cəmiyyətində silahlanmanı gücləndirib və bu əsnada silah alışının artırılması zərurəti ilə bağlı consensus yaradılıb. Hazırda münaqişənin coğrafi genişlənmə riski var və bu ekalasiya davam etdiyi təqdirdə Polşanın, Baltikyanı ölkələrin və digər Mərkəzi Avropa dövlətlərinin növbəti ilin perspektivində hərbi səfərbərlikdə iştirakı qaçılmazdır”.
Bundan əlavə, ekspert Rusiya prezidentinin hərbi səfərbərlik üçün birdəfəlik ödənişlə bağlı verdiyi qərarı bir növ ölkədə az təminatlı təbəqəni cəlb etmək üçün bir vasitə adlandırıb.
“Rusiya Ukraynaya hücumunda son cəhdlərini göstərməyə çalışır və bununla da xalqı bir növ həvəsləndirmək istəyir. Əslinə qalanda, rus xalqı prezident Vladimir Putinin səfərbərliyi ödənişli əsasla etməsindən tam olaraq razı deyil. Bu cür taktika yalnız gəliri az olan təbəqələr və kasıb regionlar üçün qismən keçərli ola bilər. Amma bütövlükdə Rusiyanı götürsək, bu metodun bütöv olaraq uğurla işə yarayacağı şübhə doğuran məsələdir”.
Vitali Yarmolenko həmçinin müharibənin son gedişatı ilə bağlı Ukrayna ordusunun mövqeləri barədə söz açıb.
“Ukrayna ordusu əks hücumları durmadan davam etdirir. Ən gərgin vəziyyət Donetsk istiqamətində olan Baxmud, Abdiyivka və Soledar rayonlarıdır. Buna baxmayaraq, Ukraynanın potensial olaraq ordu gücü Luqansk vilayətinin şimal hissəsi və Xerson rayonundakı Dniro çayı yaxınlığındakı əraziləri 1-2 ay ərzində təmizləməyə qadirdir. Təbii ki, Ukaryanın müharibədə qazanacağı gələcək uğuru Qərbdən gələn hərbi dəstək və şübhəsiz ki, Rusiyanın özünümüdafiə sistemindəki qabiliyyətindən asılı olacaq”.
Elnur Ənvəroğlu
