“Ərdoğanın Qərbə xəbərdarlıq mesajı əslində tərəfsizlik nümayiş etdirməkdir. O, bununla həm də Rusiyanın təsiri altında olan türk dünyasına hər hansı zərərin gəlməməsini təmin etməyə çalışır və Qərblə Rusiya arasında sülhü bərpa etmək istəyir”.
Bu sözləri Qafqaz Strateji Araşdırmalar Mərkəzinin (KAFKASSAM) sədri, türkiyəli politoloq Həsən Oqtay Ednews-a açıqlaması zamanı deyib.
“Türkiyə bununla Rusiya və Avropa arasında bir balans rolunu oynamağa çalışır. Son zamanlar həm Polşa, həm də İngiltərə ilə Şərqi Avropaya nəzərlərini dikən Rusiya arasında gərginlik artmağa başlayıb. Türkiyə bunların görür və III Dünya müharibəsinin baş tutmaması üçün Qərb tərəfinə bir növ xəbərdaredici mesaj verir”.
Ekspert münaqişənin həlli yolu barədə də söz açıb: “Münaqişənin ciddiləşməsi həm də Rusiya üçün bir təhlükədir. Bu təhlükədən tək bir çıxış yolu sülh razılaşmasıdır. Əks halda Rusiya həqiqətən də dünyada təcrid olunmuş duruma düşəcək. Bu da birmənalı olaraq Putin hakimiyyətinin sonunu gətirməklə yanaşı, Rusiyanı də böyük bir bəlaya düçar edəcək”.
Həsən Oqtayın sözlərinə görə dünya hazırda nüvə təhlükəsi ilə bağlı Rusiyanı böyük həyəcanla izləməkdədir.
“Hal hazırda dünyanın nəzərləri Putinin hansı nöqtəyə qədər davam gətirə biləcəyi və son anda nüvə silahına əl ata bilməsi üzərində cəmləşib. Bundan əlavə, Avropa məsələni Rusiyanın kənarından, məsələn, Qazaxıstan məsələsini gündəmə gətirməklə, ya da Xəzərdən enerji təminatını bərpa etməklə Rusiya ilə bağlılığı qismən də olsa azaldır”.
Elnur Ənvəroğlu