“Milli Məclisdə Fransanın müxtəlif xalqlara qarşı soyqırım əməlləri ilə bağlı hüquqi məsələ qaldırılmalıdır”.
Bu sözləri Ednews-a açıqlamasında beynəlxalq hüquq üzrə ekspert Rahim Məmmədov Fransa Milli Assambleyasının qətnaməsini şərh edərkən bildirib. Söhbət zamanı o, ilk növbədə Fransanın Azərbaycan və Türkiyəyə qarşı düşmənçiliyinin mahiyyətini açıqlayıb.
“Fransanın türklərə qarşı düşmənçiliyi iki yüz illik zamana söykənir. İki yüz il öncə Avropada faşist ideologiyası meydana gələndən sonra Fransa və digər imperalist ölkələr təbii resurslar və geosiyasi baxımından dünyanın müxtəlif yerlərində əlverişli əraziləri zəbt etməyə başladılar. Onlar işğalçılıq və istila siyasətində parçala, hökm et prinsipi əsas yer tutub. Fransa daxil olmaqla bir sıra Avropa ölkələri türklərin yaşadığı ərazilərin işğalına da yaşıl işıq yandırıblar.
Onlar bu prosesdə erməni amilindən məharətlə istifadə ediblər”.
Ekspert qeyd edib ki, Fransa Prezidenti Emmanuel Makronun Azərbaycana qarşı qeyri-konstraktiv mövqeyi və fikirlər səsləndirməsi bu ölkənin işğalçı Ermənistanı dəstəklədiyini sübut edir.
“Guya ki, bu dövlət ATƏT –in Minsk Qrupunun çərçivəsində iki dövlət arasında münaqişənin nizamlanmasında mühüm rol oynayıb. O ki, qaldı Fransa Senatı və Milli Assambleyasının qətnaməsinə, beynəlxalq hüquq və inkişaf etmiş ölkələrin konstitusiya hüququ bu sənədin heç hüquqi məcburiliyinin və əsasının olmadığını müəyyən edir. Bütün dünya ölkələri yaxşı başa düşür ki, Fransa parlamentinin qərarı Ermənistanı dəstəkləməyə söykənməyib. Erməni cəmiyyəti də anlamalıdır ki, Fransanın bu addımı Ermənistanı quyuya sürükləyəcək. Fransanın tarixində öz müttəfiqinə xəyanət halları çoxdur”.
Rahim Məmmədov Azərbaycanın Fransa ilə bağlı atacağı hüquqi addımlar məsələsinə də münasibət bildirib.
“Hesab edirəm ki, Azərbaycan rəsmi dövlət səviyyəsində Fransanın tarix boyu iştirak etdiyi soyqırım aktlarını dilə gətirməlidir. Milli Məclisdə məsələ qaldırılmalı və hüquqi sənəd qəbul edilməldir. Eyni zamanda Azərbaycan Fransanın Əlcəzayirdə, Ruanda və digər ölkələrdə törətdiyi soyqırımları beynəlxalq səviyyədə aktuallaşdırmalıdır”.
Sonda Rahim Məmmədov Fransanın anti-Azərbaycan siyasətinin iki dövlət arasında diplomatik münasibətlərə zərbə vuracağını bildirib.
“Ölkəmizdə Fransanın iqtisadi fəaliyyətinə son qoyulmalı, bu ölkə ilə bağlı tədbirlər dayandırılmalı, eləcə də digər ciddi addımlar da atılmalıdır. Biz öz düşmənimizə qarşı siyasi konturlarımızı ortalığa qoymalıyıq”.
Yunis Abdullayev
.jpeg)
