Erməni mediasında yayılan məlumatlara görə, Rusiya sülhməramlıları Laçın dəhlizinin açılması ilə bağlı Azərbaycan tərəfinə sabah günün ikinci yarısına qədər vaxt veriblər. Əks halda, sülhməramlılar güc tətbiq etməklə yolu açıb nəqliyyatın hərəkətini bərpa edəcəklər.
Ümumiyyətlə, rus sülhməramlıları belə bir addıma əl ata bilərmi? Rus sülhməramlılarının dinc vətəndaşlarımıza qarşı silahdan istifadə etdiyi halda tərəfimizdən hansı ciddi addımları atılacaq?
Məsələ ilə bağlı hərbi ekspertlər Ədalət Verdiyev və Şair Ramaldanov Ednews-un suallarına cavablandırıblar.
Ədalət Verdiyev qeyd edib ki, Laçın dəhlizinin açılması ilə bağlı Azərbaycan tərəfinə kimsə tələb irəli sürə bilməz.
“Sülhməramlılar yaxşı olardı ki, bizə qarşı tələblər irəli sürməkdənsə, öz fəaliyyətlərinə diqqət göstərsinlər. Rus sülhməramlılar heç bir halda etirazçılara güc tətbiq edə bilməz. Çünki dəhlizin yaxın ərazilərində Azərbaycan Silahlı Qüvvələrinin mənsubları yerləşir. Daxili Qoşunlar, ümumiyyətlə bir neçə addımlıqdadır. Rus sülhməramlıları və erməni təxribatçıları hər hansı silahlı insident törədərsə, güc strukturları dərhal müdaxilə edəcək. Əgər rus sülhməramlıları vətəndaşlarımıza qarşı silahdan istifadə edərlərsə, o zaman Azərbaycan ordusu onları bu əməllərinə görə peşman edər”.
Şair Ramaldanov isə bildirib ki, rus sülhməramlıları tərəfindən Laçın dəhlizi ilə bağlı hər hansı xəbərdarlıq verilməyib və verilədə bilməz.
“Bu aksiyada heç bir aqressiv hərəkət törədilmir, dinc və sivil şəkildə keçirilir. Aksiyanın tələbləri o qədər də ağır deyil. Hesab edirəm ki, nümayişçilərə güc tətbiq edilməyəcək. Bizim aksiya iştirakçıları orada tək deyillər. Daxili Qoşunların və digər silahlı birləşmələrimizin nümayindələri etirazçıların təhlükəsizliyini tam şəkildə təmin edirlər. Eyni zamanda bizim aksiya iştirakçıları silahlı deyillər. Hər hansı terrorçuluq niyyəti də yoxdur. Ona görə də güc tətbiq edilməsinə əsas yoxdur. Əgər vətəndaşlarımız təhlükə mənbəyi ilə üzləşərlərsə, həmin mənbə ordumuz tərəfindən dərhal aradan qaldırılacaq. Ukraynada məğlubiyyətlərə düçar olan Rusiya heç bir halda Cənubi Qafqazda ikinci bir cəbhənin açılmasında maraqlı ola bilməz”.
Yunis Abdullayev