“Güneydə yaşayan soydaşlarımız baş verən inqilab və etirazların hər hansı dəyişikliyə səbəbə olacağına o qədər də inanmırlar. Eyni zamanda unutmaq lazım deyil ki, İran adlı dövlət min illiklər boyu Azərbaycan türklərinin qurduğu, qoruduğu və yaşatdığı dövlət olub. O səbəbdən də soydaşlarımız İran dövlətini hər zaman öz dövlətləri kimi bilib o dövlətin hər hansı bir şəkildə parçalanmasına müsbət baxışla baxmayıblar”.
Bu sözləri Ednews-a Azərbaycan Yazıçılar Birliyi sədrinin müşaviri, Güney Azərbaycan Komissiyasının sədri Sayman Aruz İranda davam edən aksiyalarla bağlı fikir bildirərkən deyib. O, qeyd edib ki, məktəblərdə Azərbaycan türkcəsinin tədris edilməsinə qoyulan qadağalar, Azərbaycan musiqi və incəsənətinə qarşı aparılan siyasi-ictimai kompaniya və təziqlər, azərbaycan tarixi və milli simgələrinə qarşı aparılan təxribat və təhrifatlar soydaşlarımızı həmişə narahat edib və dəfələrlə bu qəbildən olan məsələlərlə bağlı öz etirazlarını müxtəlif formalarda ifadə ediblər.
“Onlar başa düşürlər ki, farş şovinizmi tərəfindən yönəldilən və antitürk əməlləri ilə məşhurlaşan iran dövlətçiliyinin azərbaycanlılara verə biləcək heç bir geosiyasi və ya geoiqtisadi faydası olmayacaq. Eyni zamanda İranda yaşayan xalqlar içində həm faktiki yaşadıqları ərazilərə, həm də say etibarilə birinci yerdə olduqlarına baxmayaraq, hakimiyyətlər tərəfindən hüquqlarının tanınmaması onları öz ata-baba yurdlarında, öz tarixi torpaqlarında məhbus və məğmun duruma salıb. Bu narazılıqların nəticəsi olaraq Güneydə yaşayan soydaşlarımızın bu günki İran adlanan dövlətə bağlı qalmaqları faktiki olaraq artıq mümkün deyil”.
S.Aruzun sözlərinə görə Arazın şimalında müstəqilliyini əldə edən müstəqil Azərbaycan Respublikası bu günə qədər var olan bütün siyasi oyun və hilələri darmadağın etməyi bacardı. Bu isə xüsusilə də tehran rejiminin müstəqil Azərbaycana olan düşmənliyini biraz da artırdı. İranın Azərbaycana düşmənçiliyinin, Ermənistana rəğbətinin və dəstəyinin əsas səbəblərindən biri irqçilikdir.
“Gələcəkdə quracağımız Güney Azərbaycan dediyimiz ərazinin Tehran və ətrafını, eyni zamanda qeyd etdiyim ərazi və əhalini özündə ehtiva etməsə güneylilərin qura biləcəyi müstəqil dövlətin əhalisinin sayı və ərazilərinin həcmi xeyli miqdarda azalmış olar. Sözüm odur ki, Güney Azərbaycan dediyimiz ərazinin hüdudları və rəsmi şəkildə hər kəs tərəfindən tanınan siyasi sərhədləri təyin edilməlidir. Həm də elə təyin edilməlidir ki, bütün ərazi və əhalimizi öz əhatəsinə almış olsun”.
Qeyd edək ki, İranda insanlıq adına törədilən bu vəhşilik insan hüquq və azadlıqlarına dair beynəlxalq konvensiyaların, qanunvericiliyin kobud şəkildə pozulması və Türk Dövlətləri Təşkilatına daxil olan ölkələr, eləcə də, dünya ictimaiyyəti İranda baş verən qanlı hadisələrə, humanitar böhrana laqeyd və seyrçi qalmamalı, ciddi reaksiya göstərməlidir.
Oğuz Ayvaz