Sabah 20 Yanvar faciəsinin ildönümüdür.
Qanlı Yanvar hadisələrindən 33 il keçir. 1990-cı il yanvarın 20-siAzərbaycanın müasir tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olub, milli müstəqillik, azadlıq uğrunda mübarizəsinin və yenilməz iradəsinin rəmzinə çevrilib.
Ednews siyasi partiyalarla sabahkı günlə bağlı sorğu keçirib. Partiyalar20 Yanvar gününə necə hazırlaşıb?
Müasir Müsavat partiyasının rəhbəri Hafiz Hacıyev:
“Partiyamızın idarə üzvləri ilə toplaşıb qərar qəbul etmişik. 20 yanvar günü üçün partiya üzlərimizə tapşırıqlar vermişik. Bir yerə toplaşıb Şəhidlər Xiyabanını ziyarət edəcəyik. Allah şəhidlərimizə rəhmət etsin. Partiya olaraq hər il bu məsələdə üzüntülərimizi yad edirik. Təəssüf ki, bu gün 20 yanvar faciəsinə siyasi qiymət verilməyib”.
Böyük Azərbaycan partiyasının sədri Elşad Musayev:
“Böyük Azərbaycan partiyası 20 yanvar gününə bu gündən hazırlaşır. Bu gün saat 14:30-da Şəhidlər Xiyabanını ziyarət etməyi planlaşdırırıq. Çünki son zamanlar 20 yanvar günündə siyasi təşkilatların xiyabana ziyarəti zamanı qarşıdurma olub. Təəssüf ki, belə hadislər yaşanıb. Ona görə də qərara gəldik ki, yanvarın 19-da şəhidlərimizi ziyarət edək. Allah şəhidlərimizin yerini uca etsin! Millət olaraq bu bizim borcumuzdur. Onlar millət, vətən üçün canlarından keçiblər”.
Xalq Cəbhəsi partiyasının sədri Pənah Hüseyn:
“Ənənəvi olaraq Şəhidlər Xiyabanını ziyarət edəcəyik. Bu barədə müəyyən materiallarla mətbuatda çıxış etmişik. Bu il də belə olacaq”.
AĞ partiya rəhbəri Tural Abbaslı:
“Partiya olaraq hər il 20 yanvar tədbirlərində iştirak edirik. Xüsusi hazırlığa ehtiyac duymuruq. Çünki, partiyanın hər bir üzvü 20 yanvar şəhidlərini ziyarət etməyi özünə borc bilir. Hər bir AĞ partiyaçı da sabah Şəhidlər Xiyabanında olacaq. Biz də şəhidlərimizə ehtiramımızı sərgiləyəcəyik, qayğımızı göstərəcəyik. Bəzi insanlardan, partiyalardan fərqli olaraq 20 yanvar günü şəhidlərimizi ziyarət edəcək və insanlarla növbə daynıb öz sayğımızı göstərəcəyik. Hər bir partiyanın da belə bir addım atmasına çağırış edirəm. Yəni 20 yanvara 1-2 gün qalmış gedib şəkil çəkdirmək yox, məhz həmin gün həmrəylik göstərmək lazımdır”.
Oğuz Ayvaz
