Türkiyə prezidenti Rəcəb Tayyib Ərdoğan bazar ertəsi İsveçdəki etirazlara görə İsveç hakimiyyətini sərt tənqid edib.
Belə ki, Türkiyənin Stokholmdakı etirazlara reaksiyası, xüsusən də ifrat sağçı bir şəxs tərəfindən müqəddəs Quran kitabının yandırılması ölkələr arasında artan uçurumun daha da dərinləşməyə doğru getdiyini göstərib. Şənbə günü Türkiyənin Stokholmdakı səfirliyi qarşısında radikal irqçi fəal Rasmus Paludanın müqəddəs Quran kitabını təhqir edərək yandırması həm də, Türkiyədə üç günlük etirazlara səbəb olub.
Hadisə ilə bağlı mediaya açıqlama verən Türkiyə prezidenti R.T.Ərdoğan İsveç hakimiyytinə səslənərək, hökumətə sərt mesaj verib:
“Bu pozğunluğu təşviq edənlər, şübhəsiz ki, onun nəticələrini də düşünüblər. ... Əgər həqiqətən insan hüquq və azadlıqlarına hörmət edirsinizsə, o zaman ilk növbədə Türkiyənin və müsəlmanların dini inanclarına hörmət edəcəksiniz. Əgər bu hörməti göstərməsəniz, o zaman NATO ilə bağlı bizdən heç bir dəstək gözləməyin”.
Qeyd edək ki, hadisələr İsveç və Finlandiyanın Türkiyənin NATO üzvlüyünə dəstəyini qazanmağa çalışarkən cərəyan etməyə başlayıb. Digər tərəfdən, terrorçu qrup olan PKK və YPG-nin dəstəklənməsi ilə bağlı rəsmi Stokholma edilən xəbərdarlıqlar onu göstərir ki, hakimiyyətdə olan siyasi dairələr üçün ölkənin gələləcək əmniyyəti deyil, daha çox anti-İslam və anti-Türk ambisiyaları önəm daşıyır.
Bundan əlavə hər kəsə məlumdur ki, həm İsveç, Niderland və buna bənzər digər ölkələrin hakimiyyət orqanları siyasi partiyaların radikal sağ qolu tərəfindən təmsil olunur və eyni zamanda, onlar öz dəstəklərini yeri gələndə terrorçu və separatçı qüvvələrdən almaqdan belə çəkinmir.
Elnur Ənvəroğlu
