Xəbər verdiyimiz kimi, deputat Erkin Qədirlinin bloqer Mehman Hüseynovla kiçik müsahibəsi müzakirələrə səbəb olub. Bloqer deputata cəmi bir sual ünvanlayıb: “Mənə Milli Məclisdən bir deputatın adını çəkin ki, həqiqətən də xalqın səsini qazanıb və parlamentdə oturub”.
Erkin Qədirli isə “Vallah heç onu özüm barədə də deyə bilmirəm. Demokratik seçki olsa, onda əminliklə demək olardı. Amma bizdə demokratik seçki yoxdur axı” cavabını verib.
Məsələ ilə bağlı Ednews-a fikirlərini bölüşən Milli Məclisin deputatı Elnur Allahverdiyev deyib ki, hər bir vətəndaş kimi, həmkarım da fikir və qənaətlərində azaddır. Ancaq fikrimcə, tək özü deyil, başqaları, konkret olaraq Milli Məclisdə təmsil olunan bütün deputat həmkarları adından belə bir açıqlama verməsi düzgün deyil.
“Bu, ən azı bir sıra suallara yol açır. Məsələn, əgər seçki qeyri-demokratik keçirilirsə və həmkarım da seçicilərinin səsini qazanıb-qazanmadığını bilmirsə, onda nədən 3 ilə yaxındır ki, Milli Məclisdə təmsil olunur? Üstəlik, Erkin bəy nəinki qanunverici orqanda deputat kimi seçicilərini, eyni zamanda, müxtəlif beynəlxalq təşkilatlarda və dostluq qruplarında da Milli Məclisi təmsil edir. Yaxud, əgər həmkarım həqiqətən seçicilərinin səslərini qazanıb-qazanmadığını bilmirsə, bu ona dəlalət edirmi ki, bu qənaətə bütün deputatlara münasibətdə gələ bilər və ya heç bir deputat xalqın səsini qazanmayıb?"
Deputat bildirib ki, təmsil olunduğum 17 saylı dairə ilə “qonşu” olan həmkarından belə cavab gözləmirdi:
"Ona görə gözləmirdim ki, biz ikimiz də eyni rayondan seçilmiş deputatlarıq, müxtəlif tədbirlərdə birgə iştirak edirik, ən azı seçicilərlə keçirdiyimiz qəbullarda müxtəlif şikayətlər, problemlərlə müraciət edən sakinlərin qaldırdıqları məsələləri icra orqanları ilə həll etməyə çalışırıq. Və bu zaman məhz millət vəkili statusumuzdan istifadə edirik. Seçilmiş deputat olaraq. Qəbulumuza, yanımıza gələn həmin sakinlər də məhz deputat olduğumuz üçün bizə müraciət edirlər. Belə çıxır ki, o, qeyir-demokratik yolla seçilib və bundan istifadə edib legitim icra orqanları ilə seçicilərin problemlərini həll edir?"
"Mən 17 saylı Yasamal üçüncü seçki dairəsinin deputatı olaraq seçildiyim ilk gündən seçicilərimin problemləri və qayğıları ilə yaxından maraqlanmağa və onların həlli işində dəstək olmağa çalışmışam, bu gün də bu işi davam etdirirəm. Dairədə gördüyüm işlər barədə sosial şəbəkələrdəki hesablarım vasitəsilə mütəmadi məlumat paylaşıram. O cümlədən, ilin ilk yarısı və sonunda fəaliyyətim barədə geniş hesabatımı bölüşürəm. Ancaq düşünürəm ki, hələ seçicilərimin istək və arzularını tam yerinə yetirə bilməmişəm. Bu baxımdan, təbii ki, hər bir deputat yalnız öz dairəsi, seçiciləri ilə bağlı nəyisə yəqin söyləməlidir. Ona səs verən seçicilərini tanımalı, onların problemləri ilə maraqlanmalıdır. Bunun üçün seçiciləri ilə daim ünsiyyətdə olmalı, onların qayğıları ilə ilgilənməlidir. Bu halda əminliklə seçildiyini, ya seçilmədiyini də bəyan edə bilər. Çünki həmin münasibəti seçicilərindən görür və gördüyü münasibət də onun əminliyinin başlıca şərtidir.
Demokratiyanı şübhə altına salan həmkarımdan fərqli olaraq mən düşünürəm ki, hər kəs öz mövqeyində, söylədiklərində və dünyagörüşündə azaddır. O cümlədən, təmsil etdiyi orqanı belə demək mümkündürsə, bəyənmirsə, yenə də qərarı özü verməlidir. Biz sadəcə olaraq təəssüf edə bilərik", - o, əlavə edib.
Millət vəkili Hikmət Babaoğlu isə qeyd etdi ki, Erkin Qədirlinin sosial şəbəkələrə verdiyi açıqlamasında öz deputatlıq statusunu şübə altına alan fikirlər bildirməsi ziddiyətli və anlaşılmazdır. Ona görə ki, Erkin bəy siyasətçi olmaqla bərabər həm də hüquqşunasdır və səsləndirdiyi fikirlərin hansı hüquqi nəticələr doğura bilməsi ilə bağlı aydın təsəvvürləri var.
“Məsələn, nəticəsinə hüquqi baxımdan şübhə etdiyi seçkilərin ona verdiyi mandatı qəbul etməsi onun hüquqa münasibətinin göstəricisi hesab oluna bilər. Yəni Erkin bəy, iddia etdiyi kimi , hüquq pozuntusu nəticəsində əldə etdiyi mandat hüququndan imtina etmirsə deməli o hüquqa da hörmət etməmiş hesab oluna bilər. Yaxud demokratik hesab etmədiyi seçkinin nəticəsini qəbul edirsə deməli siyasətçi kimi onun demokratiyaya da münasibəti birmənalı qəbul olunmaya bilər. Ona görə də belə məsələlərdə diqqətli olmalı və təmsil olunduğumuz Milli Məclisin nüfuzu və legitimliyi ilə bağlı şübhə yarada biləcək sözlər sərf etməməliyik. Nəticə etibarilə bu həm də deputatlara səs vermiş seçicilərin səslərinə hörmətsizlik kimi qəbul edilə bilər”.
Oğuz Ayvaz
