“Güman edirəm ki, həmkarımız Erkin Qədirli o sözləri zarafatyana deyib və belə rezonans yarada biləcəyini ehtimal etməyib”.
Bu sözləri Ednews-a deputat Cavanşir Feyziyev millət vəkili Erkin Qədirlinin Azərbaycanda demokratik seçki yoxdur sözlərinə münasibət bildirərkən deyib.
“Çox ciddi görünməklə yanaşı Erkin Qədirlinin həm də güclü yumor hissinə malik olduğunu sezmişəm. Zənnimcə, jurnalist onun yumorunu anlamayıb və ciddi qəbul edib. Nəticədə qarışqadan fil düzəltməyə meylli olanlar üçün yeni bir mövzu tapılıb”.
Deputatın sözlərinə görə, hər bir deputat məhz demokratik seçkilər yolu ilə mandat qazanıb. O başqa məsələdir ki, seçkiləri uduzmuş digər namizədlərdən bəziləri məğlubiyyətlə barışa bilmir və ömürlük düşmənə çevrilir.
“Nə qədər ki, onun rəqibi deputatdır, mətbuatda ona qarşı əks-təbliğat kampaniyası aparır və nəticədə onun demokratik yolla seçilməməsi haqqında şübhələr formalaşdıra bilər. Bu da azad mətbuatın yan fəsadlarından biridir. Amma bu heç də həqiqət demək deyil”.
Oğuz Ayvaz