Son günlər İsraillə İran arasında kəskinləşən münasibətlər bir növ müharibə abi-havasını daha da fəallaşdırıb. Artıq İranın hərbi bazalarına atılan raketlərdə İsrailin adının hallanması bu baxımdan ciddi önəm daşımağa başlayıb.
Ednews-a açıqlamasında İsrailli siyasi ekspert Baruk Leviyev proseslərə aydınlıq gətirib.
“Gərginlik həmişə mövcud olub, bəlkə də kənardan hamı buna fərqli baxırdı, amma İsraildə həm hərbi rəhbərlik, həm siyasi qurum, həm də İsrail xalqı kimi hamı İranın kim olduğunu və məqsədlərinin nə olduğunu aydın başa düşür. Hərbi nöqteyi-nəzərdən, istər bu gün, istər sabah, istərsə də yaxın vaxtlarda müharibə olsa da, İsrail ordusu daim döyüş hazırlığındadır,” deyə, ekspert bildirib.
Müharibənin başlaması üçün hərəkətverici amilin nə olduğuna toxunan B.Leviyev əlavə edib ki, hər şey buna səbəb ola bilər: “Buna səbəb ölkə daxilində ən kiçik qığılcım və ya sərhəddə təxribat belə ola bilər. Bununla belə, sual hələ də cavabını tapa bilmir. Tərəflərdən hansının müharibəyə birinci başlamaq istəyəcəyi məlum deyil. Hesab edirəm ki, istənilən müharibədə təkcə bununla birbaşa əlaqəli olan dövlətlərin deyil, kənardan bəzi dövlətlərin də müəyyən maraqları var”.
Politoloq vurğulayıb ki, İsrail müharibə olacağı təqdirdə heç bir tərəfi buna cəlb etmək niyyətində deyil.
“İsrailin heç kimi müharibəyə sürükləməsinə ehtiyacı yoxdur. Hətta bizim heç bir qlobal strategiyamız belə yoxdur. Məqsədimiz vətənimizi, xalqımızı qorumaqdır. Digər ölkələrin, məsələn, Rusiya və ABŞ kimi böyük dövlətlərin hər hansı hərbi münaqişəyə cəlb olunma ehtimalı daha yüksəkdir və onların strategiyası fərqlidir. İranın belə düşünə biləcəyini istisna etmirəm. Onlar da öz növbəsində açıq şəkildə bildirirlər ki, ABŞ-ın məqsədi guya onların ölkəsini, “İslam dünyası”nı məhv etməkdir”.
Müttəfiqlik məsələsinə toxunan siyasi ekspert “müttəfiqlikdə güvəndən söz gedə bilməz” deyə vurğulayıb.
“İsrail tərəfdar görmür. Biz heç vaxt tərəfdarlara güvənmirik. Lakin diplomatik qaydalara əsasən bizim müttəfiqimiz 99,9% ABŞ olub və elə də qalır. Mən bura İngiltərə və Aİ ölkələrinidə əlavə edə bilərəm. Yeni müttəfiqlər arasında Azərbaycanı da qeyd etmək olar. Baxmayaraq ki, hamı bu barədə ehtiyatla danışır, mən bu siyahıya Azərbaycanı da əlavə edə bilərəm. Bu çox həssas məsələdir. Çünki Azərbaycan və İran iki müsəlman ölkəsidir. Bununla belə, mən və bir çox digər ekspertlər hesab edirik ki, Azərbaycan həqiqətən də İsrailin regionda strateji tərəfdaşı və müttəfiqidir.”
İsrailin ikinci Qarabağ müharibəsində Azərbaycana hərtərəfli dəstəyini nəzərə alaraq, İsrailin Azərbacandan hansı dəstəyi gözləməsi məsələsinə toxunan Baruk Leviyev qeyd edib ki, İranla İsrail nə qədər düşmən olsa da, müharibə etməyin heç bir mənası yoxdur.
“Müharibənin birmənalı olaraq tərəfdarı deyiləm və bu heç kimə lazım deyil, xüsusən də İranla sərhəddə yerləşən Azərbaycana. Bizim İranla münasibətlərimizə gəlincə, ortada hər şey aydın görünür, biz həmişə düşmən olmuşuq. Lakin bu Azərbaycan üçün fərqlidir. İranda çoxlu etnik azərbaycanlı yaşayır, ona görə də bu müharibənin baş tutması lüzumsuzdur”.
Elnur Ənvəroğlu
