Xəbər verdiyimiz kimi, Milli Məclisin deputatı Zahid Oruc bu gün keçirilən plenar iclasda Avropa İttifaqının Ermənistan sərhədində mülki missiyasının yaradılmasının yolverilməz olduğunu qeyd edərək, alternativ tədbir olaraq Ağdamda yerləşən Türkiyə-Rusiya monitorinq mərkəzinin Ermənistanla sərhədə yerini dəyişməsini təklif edib.

Təkliflə bağlı Ednews-a danışan politoloq Zərdüşt Əlizadə bildirdi ki, birincisi Ermənistan suveren dövlətdir. Avropa İttifaqı beynəlxalq bir birlikdir. Suveren dövlət beynəlxalq birliklə hansı müqavilə bağlayıb?

“Beynəlxalq hüquqa ziddir. Rus müşahidəçiləri rus komandanlığına tabe, Türkiyə müşahidəçiləri də türk  komandanlığına tabedir. Ermənistan avropa müşahidəçilərinin Azərbaycanla sərhəddə yerləşdirməklə ona nail olmaq istəyir ki, Azərbaycan tərəfdən hücum olarsa Avropa bu barədə obyektiv məlumat versin. Hücum edən Ermənistandı yaxud Azərbaycanmı deyə. Azərbaycan məgər Ermənistan tərəfdən hücum gözləyir?”

Politoloq əlavə edib ki, hazırda müşahidəçilər Azərbaycan-Ermənistan sərhəddində oturub müşahidə sistemi vasitəsilə prosesi nəzarətdə saxlayır. Bu halda bir növ bizə imkan verməyəcəklər ki, müharibəyə başlayıb sülhə məcburetmə işi görək. Biz başlayan kimi həmin missiya elan edəcək ki, ilk atəşi Azərbaycan açıb.

“Ermənistan əlbəttə, bununla özlərini bir növ sığortalayırlar. Eyni zamanda təxribat da həyata keçirə bilməyəcəklər. Əvvəl ruslar onlara əmr verirdi ki, təxribat törədin, onlar da bu əmri yerinə yetirirdilər. İndisə rusların da imkanı əlindən çıxır. Yəni öz nəzarətində olan erməni ordusunda kiməsə təxribat törətmək göstərişi vermək imkanı olmayacaq. Çünki müşahidə missiyası həm də erməni orudusuna nəzarət edir. Belə bir şey olsa elan edəcəklər ki, təxribatı erməni ordusu törədib”.

Oğuz Ayvaz