Xəbər verdiyimiz kimi, Ermənistanın Türkiyəyə humanitar yardım göndərməsi səbəbilə iki ölkə arasında 30 il bağlı qalan sərhəd açılıb. Sərhədin açılmağı iki ölkə arasındakı münasibətlərə necə təsir göstərəcək? Bu prosesin Zəngəzur dəhlizinin açılmasında hər hansı müsbət təsiri ola bilərmi ?
Məsələ ilə bağlı Ednews-a danışan politoloq Tofiq Abbaslı bildirib ki, haqqında danışdığımız yardım sırf ekstremal vəziyyətlə əlaqəlidir.
“Türkiyədə baş verən dəhşətli zəlzələyə görə bütün ölkələr humanitar yardım göndərirlər. Biz bilirik ki, erməni xalqının bir çox nümayəndələri yekəxana davranışlar sərgiləyirlər. Onlar iddia edirlər ki, guya dünyanın bütün aparıcı əsas ixtiraları onlara məxsusdur. Əgər Ermənistan Türkiyəyə yardım göndərməsəydi kölgəli vəziyyətdə qalacaqdı. Həm qonşu dövlətdir, həm də onları birləşdirən keçmiş var. Çünki uzun müddət ermənilər Osmanlı dövlətinin tərkibində yaşayıblar. Bu gün də Türkiyədə 200 mindən artıq erməni yaşayır. Siyasi cərəyanlar başqa məsələdir. Burada diplomatiya öz sözünü deməlidir. Amma humanitar sahədə Ermənistan bunu etməli idi”.
Onun sözlərinə görə, müəyyən mənada münasibətlərə bu addım bir qədər yumşaqlıq gətirə bilər.
“Bundan sonra ola bilsin ki, bu dialoqda bir təkan əmələ gəlsin. Siyasi prosseslərdə də təkanların özünəməxsus rolu var. Hər iki tərəfin diplomatları təhkim ediblər ki, dialoqlar davam etdirilsin. Türkiyə həmişə olduğu kimi bu məsələyə ciddi yanaşır. Ermənistan tərəfi Azərbaycanla sülh prossesi ətrafındakı danışıqlara kimi gah nala, gah da mıxa vurur”.
Politoloq qeyd edib ki, prosseslərin fonunda biz həqiqətən də dönüşümün olduğuna ehtimal verə bilərik.
“Hər halda bir başa təmaslar mövcuddur. Ermənistan dövlətinin Türkiyəyə yardım etməsi heç də birmənalı qarşılanmır. Biz bunu sosial şəbəkələrdən açıq şəkildə görə bilirik. Ermənilərin radikal üzvləri zəlzələdən əziyyət çəkmiş şəxslərə edilən yardımla bağlı necə çirkin ifadələr işlətdiyinin şahidi olduq”.
Politoloq həmçinin iki ölkə arasında sərhədlərin açılmasının Zəngəzur dəhlizinə təsirinə də aydınlıq gətirib.
“Zəngəzur dəhlizinin açılması həm də Türkiyənin marağında olan bir məsələdir. Əgər rəsmi Ankara və İrəvan arasında ciddi mənada bir tərpəniş olarsa Türkiyə tərəfi bu məsələni də gündəmə gətirə bilər. Ümumiyyətlə, Avrasiya regionunda ən problemli vəziyyətdə yaşayan ölkə Ermənistandır. Ermənistan beynəlxalq inteqrasiya layihələrindən sonra əsas cərəyanların hər birindən kənarda dayanıb. Bu da onların tənəzzülünü daha da sürətləndirir. Ermənistan bu məsələyə münasibət bildirməlidir. Zəngəzur dəhlizi zamanın çağırışıdır. Buna müsbət reaksiya vermək lazımdır”.
Ayan Rzayeva