“Düşünürəm ki, Qarabağda son qarşıdurmaların səbəbi Lavrovun son səfəridir”.
Bu fikirləri Ednews-a “Dona Gracia” Diplomatiya Mərkəzinin baş icraçı direktoru, israilli redaktor, jurnalist və siyasi analitik Reyçel Avraham Ermənistanla Azərbaycan arasında son zamanlar baş verən münaqişə ilə bağlı məsələni şərh edərkən bildirib.
“Düşünürəm ki, münaqişəyə səbəb Rusiyanın Azərbaycanla Ermənistan arasında sülh üçün çox yaxşı şansın yarandığını görməsidir. Həqiqətən də onlar sülh üçün yaxşı bir şansın olduğunu düşünürlər. Üstəlik, buna görə də öz nəzarət və təsirlərini itirmək istəmirlər və sülhə mane olmağa çalışırlar. Bu səbəbdən də Xankəndinə davamlı silah daşınmasına icazə verilir, çünki ruslar sülhün əldə olunacağından qorxurlar”.
İsrailli jurnalistin sözlərinə görə, Rusiyanın Xarici İşlər naziri Lavrov Azərbaycana səfər etməsi Rusiya ilə Azərbaycan arasında müttəfiqliyin yaradılmasının bir illiyinə təsadüf edirdi.
“Ola bilsin ki, ermənilər də Moskva ilə əlaqələrinə nəzarət və təsir imkanlarını itirəcəklərindən narahatdılar. Mənim fikrimcə, qarşıdurmanın əsas səbəbi bu idi. Qarşıdurmanın əsas səbəbi silah daşınmasının davam etməsidir ki, onlar sülh müqaviləsindən qorxurlar”, - deyə politoloq əlavə edib.
Politoloq vurğulayıb ki, Azərbaycanla Ermənistan arasında sülhün bərqərar olması yolunda çoxlu maneələr var və bu maneələri aradan qaldırmaq artıq kifayət qədər çətinləşib:
“Ancaq Rusiya kimi üçüncü tərəfin səhnədə olması və münasibətləri daha da çətinləşdirməsi həqiqətən də yaxşı deyil. Mən çox istərdim ki, Rusiyanı regionu tərk etsin və Azərbaycanın bu ərazilər üzərində öz nəzarətini bərpa etsin. Çünki bu ərazilər BMT Təhlükəsizlik Şurasının dörd qətnaməsi əsasında Azərbaycanın bir hissəsi kimi tanınır. Ümid edirəm ki, bu torpaqlar tezliklə tam Azərbaycanın nəzarətinə keçəcək və hər kəs əmin-amanlıq, firavanlıq içərisində yaşayacaq”.
Reyçel qarşıdurmada həyatını itirən əsgərlərimiz üçün də kədərləndiyini dilə gətirib:
“Onu da əlavə etmək istərdim ki, regiona davamlı silah axını səbəbindən Azərbaycan əsgərlərinin bu qarşıdurmada həyatını itirməsi çox faciəvi bir haldır. Davamlı silah axınının sona çatmasının və bu problemin həll edilməsinin vaxtı artıq çatıb”.
Ülviyyə Şahin
