Son günlər Ermənistanla Azərbaycan arasında gərginlik artır, atəşkəs pozulur. Martın 24-ü axşam saatlarında Ordumuzun Azərbaycan-Ermənistan şərti sərhədində və Qarabağ iqtisadi rayonunda yerləşən mövqeləri bir neçə dəfə atəşə tutulub. Bundan başqa Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Ordumuzun Xocavənd rayonu istiqamətində yerləşən mövqeləri də atəşə məruz qalıb.

Sülhməramlılar olduqca sülh müqaviləsi nə qədər realdır?

Bu barədə Ednews-a politoloq Elçin Mirzəbəyli şərh bildirib. Onun sözlərinə görə Ermənistan tərəfindən sərhəd bölgəsində atəşkəsin tez-tez pozulması, eləcə də Rusiya sülhməramlılarının müvəqqəti məsuliyyət zonasına daxil olan Azərbaycan ərazilərində qanunsyz silahlı qrupların davamlı təxribatlara əl atması bir neçə aspektdən şərh oluna bilər:

“Ermənistan Azərbaycanla sərhəd bölgəsində yerəşən Avropa İttifaqının yarımülki missiyasının sayının artırmağa və getdikcə prosesə xarici hərbi kontingentin cəlb edilməsi üçün zəmin yaratmağa, növbəti mərhələdə isə eyni prosesi Azərbaycan ərazlərinə - Qarabağa daşımağa çalışır. Rusiya sülhməramlılarının təxribatlara imkan yaratması isə belə bir ehtimal ortaya çıxarır: Ola bilsin ki, parodoksal görünsə də Kreml Qərbin diqqətini Ukraynadakı müharibədən yayındırmaq, qüvvələri parçalamaq, Qərbə qarşı koalisiya formalaşdırmaq və hazırda neytrallıqlarını qorumağa çalışan MDB ölkələrini bu prosesə mümkün qədər cəlb etmək üçün bölgədənkənar qüvvələri lokal müstəvidə olsa da belə regiona cəlb etmək istəyir. Şübhəsiz ki, bu, kifayət qədər riskli bir ehtimaldır, amma Rusiya sülhməramlılarının davranışları bu ehtimalın da real ola biləcəyini istisna etmir. 

Politoloq əlavə etdi ki, əks təqdirdə, belə bir sual ortaya çıxır: Moskva hansı səbəblərdən separatçıları himayə edir və təxribatların qarşısını almır, gizli yollarla qanunsuz hərbi birləşmələrin silah-sursatla və canlı qüvvə ilə təmin olunmasına imkan yaradır, Aİ missiyasının bölgəyə müdaxiləsinə göz yumur və buna qarşı heç bir real tədbirə əl atmır?  

“Göründüyü kimi Moskvanın davranışları Rusiyanın Azərbaycanla Ermənistan arasında 44 günlük müharibənin nəticələrinə uyğun olaraq, sülh müqaviləsi imzalanmasına xidmət etmir, əksinə qarşıdurmaya zəmin yaradır. Bu isə onu deməyə əsas verir ki, hazırda Rusiya bölgədə sabitliyin bərpasına maneə yaradan əsas qütbdür. Çünki Rusiyadan olan sülhməramlıların məsuliyyət zonasına daxil olan Azərbaycan ərazilərində baş verən təxribatların qarşısını almaq imkanı olduğu halda, bu istiqamətdə nəinki heç bir addım atmır, əksinə təxribatların genişlənməsi üçün separatçılara dəstək verir. Bu baxımdan, həm Rusiyanın, həm də Ermənistanın davranışları onu deməyə əsas verir ki, 10 noyabr 2020-ci il bəyanatı de-fakto qüvvədən düşüb və Rusiya sülhməramlılarının Azərbaycan ərazisində mövcudluğuna son qoyulmalıdır”.

Oğuz 

• Tag:
• politoloq
• siyasət
• Qarabağ