Son vaxtlar İranda aksiyalar yenidən aktivləşib. Qadınlar hicablarını çıxarır, insanların sosial vəziyyəti acınacaqlı olduğundan etirazlar səngimir. İranda etiraz aksiyaları səngiyəndən sonra sərt şəriyət qaydalarının tətbiqi və vətəndaşların şəxsi həyat tərzlərinə qarşı müdaxilələr artıb.
Son bir neçə gün ərzində İranın müxtəlif bölgələrində onlarla iş yeri və ticarət mərkəzi məcburi hicab qaydalarına riayət edilmədiyi, oruc tutulmadığı və musiqi yaydıqları üçün qapadılıb.
Həmçinin onu da qeyd edək ki, Tehran Azərbaycanın müstəqilliyindən sonra mütəmadi olaraq ölkəmiz əleyhinə qara piar aparır. Təəssüflər olsun ki, bu məsələdə insanların dini inanclarında istifadə edilir, daha çox islam şiəliyi deyil, Xomeynilik təbliğ olunur.
Güneyli soydaşımız, hazırda Finlandiyada yaşayan siyasi şərhçi Çingiz Göytürk mövzu ilə bağlı Ednews-a danışıb. Onun sözlərinə görə bir sıra hegemon Qərb dövlətləri İranda yaşayan xalqların istək və iradələrinə qarşı fars irticasının bir digər nümayəndəsi olan və başda Azərbaycan türkləri olmaqla xalqlar içərisində heç bir nüfuza malik olmayan Rza Pəhləvini şişirdərək proseslərin önünə atmaqla molla rejiminin dərin bir nəfəs almasına şərait yaratdılar.
“Proseslər küçə nümayişlərindən daha çox fərqli platformalara daşınıb. O platformalarda davam etməkdədir. Bu hadisələr başlayandan bəri burada yalnız bir cərəyan deyil, 3 fərqli cərəyanın paralel hərəkət etdiyini ifadə etmişdik.
Bunlardan ilki qadın haqq və azadlıqları ilə bağlı cərəyan idi. Bu sahədə rejimə qarşı dirəniş olduğu kimi davam etməkdədir. Heç bir səngimədən söhbət gedə bilməz. Hətta bu sahədə əldə olunan böyük uğurlardan da danışmaq mümkündür. Bu gün İran küçələrində məcburi hicabdan imtina edən qadınların nə qədər çox olduğunu hamımız görürük.
İkincisi İranda yaşayan qeyri-fars millətlərin hərəkatları idi. Bu sahədə rejimin sərt və repressiv siyasəti nəticəsində qismən səngimə müşahidə olunsa da, proseslər dayandırıla bilməmiş və inkişaf edərək davam etməkdədir. Bəllucların, əhvaz ərəblərinin, kürdlərin və ən önəmlisi Azərbaycan türklərinin yaşadığı bölgələrdə milli hərəkatlar öz inkişaf sürəsini yaşamaqdadır.
Üçüncüsü isə rejim dəyişikliyi uğrunda mübarizə idi. İran deyilən ölkədə yaşayan qeyri-fars millətlərin apardığı bu mübarizənin səngidiyini daha bariz müşahidə edirik. Burada rejimin edamlar başda olmaqla, qatı repressiv tədbirləri ilə yanaşı bir sıra digər önəmli səbəbləri də gözardı etmək mümkün deyil. Bu proseslərin ən önəmli nöqsanının rejim dəyişikliyi sonrası üçün alternatilərin şəffaf və konkret çizgilərlə müəyyləşdirilməməsi olduğunu vurğulamışdıq”.
Güney Azərbaycan Milli Azadlıq Cəbhəsinin beynəlxalq əlaqələr şöbəsinin rəhbəri, siyasi şərhçi Əhməd Obalı isə açıqlamasında bildirdi ki, İran fars dövlətidir və Tehran rejimi daim Şimali Azərbaycanın güclənməsindən qorxub.
Əhməd Obalı vurğulayıb ki, Güney Azərbaycan azad olunana qədər bu düşmənçilik davam edəcək. İran regionda əvvəlki yerinə qayıda bilmir. Digər tərəfdən, İranın daxilində iqtisadi-siyasi və sosial sahələrdə böyük bir böhran var və onunla mübarizə apara bilmir. İran bütün bu böhranlardan fikirləri müvəqqəti də olsa başqa bir yerə çəkməyə çalışır.
“Güneylilər olaraq bu qərara gəlmişik ki, bütün hüquqlarımızı bərpa etmək istəyiriksə, dövlətimizi, Güney Azərbaycanı qurmalıyıq. Bununla da böyük bir dərdi başımızdan uzaqlaşdıracağıq. Həm Quzeydə, həm Güneydə birləşməyə doğru addım ata bilərik. Bundan sonra İran dövləti Ermənistanı bizim üstümüzə qısqırda bilməyəcək. Bu baxımında keçirilən repressiyaların cavabında Güney azərbaycanlılar daha da aktivləşiblər. Milli dövlətçiliyimizin qurulması yolunda hədəfimizi düzgün qoymuşuq. Biz İran çərçivəsində hər hansı hüquqa inanmırıq və bizim hüquqlarımız verilməyəcək. Qanunda yazılsa belə icra olunmayacaq. Dəfələrlə biz buna şahid olmuşuq”.
Oğuz
