Dünən Livanın İsrailə endirdiyi 100-ə yaxın raket zərbəsindən sonra, bu gün Baş nazir Binyamin Netanyahu edilən hücumlara baxmayaraq, ölkəsinin istənilən düşmənə cavab verməyə hazır olduğunu bildirib. Bu yaxınlarda İsrail rəsmiləri öz açıqlamalarında vurğulayıb ki, İranla vuruşmağa hazırdırlar. Ötən gün ölkənin xarici işlər naziri Eli Kohen də öz “twitter” hesabında hadisəyə münasibət bildirərək İsrail dövlətinin öz xalqını müdafiə etmək üçün bütün lazımi tədbirləri görəcəyini deyib.
Livandan İsrail ərazisinə endirilən raket hücumlarının İranın maliyyələşdirdiyi Hizbullah terror qruplaşması tərəfindən edildiyi bildirilir. Rəsmi Vaşinqton da Qəzza və Livandan İsrailə edilən raket hücumlarını pisləyib. ABŞ Dövlət Departamenti İsrailin istənilən təcavüzə qarşı özünü müdafiə etmək hüququnu tanıdığını açıqlayıb. ABŞ-a artıq nüvə proqramı maraqlı deyil, o, açıq şəkildə İranla vuruşacağına işarə edir.
Proseslər necə davam edəcək? İran-İsrail toqquşmaları nə dərəcədə reallaşa bilər? Yoxsa bu təhdid olaraq qalacaq?
Son hadisələrlə bağlı Ednews-un sualarını cavablandıran politoloq Ramiyə Məmmədovanın sözlərinə görə, münaqişə tərəflərinin qarşılıqlı olaraq bir-birinə etdiyi hücum və təhdidlər bölgədə gərginliyin artmasına səbəb olur:
“Yaxın Şərq artıq uzun illərdir davam edən İsrail-Livan və İsrail-Fələstin savaşlarına şahidlik edir. İsrail özü dəfələrlə Qüds şəhərində fələstinlilərin yaşadığı ərazilərə silahlı hücumlar edib. Bu siyasətə cavab olaraq Livan və Fələstin tərəfi də İsrailə qarşı əks-hücuma keçir. Yəni, bütün tərəflər gərginliyi alovlandırmaqla məşğuldur. İsrail-Fələstin münaqişəsinə region dövlətləri tərəfindən daim təzyiqlər edilir. Fələstinin terror təşkilatlarını verdiyi dəstəyi də burada qeyd etməliyik. Fələstin İsraillə mübarizə aparmaqçün terror qruplaşmalarına qapı açır. Livandan, Fələstin və Qəzza bölgəsindən atılan raket hücumları ən çox Hizbullah tərəfindən edilir. Hizbullah dünyada terror təşkilatları sırasında ilk yerləri tutur. İran Hizbulah kimi terror təşkilatlarına daim maddi dəstək verir”.
R.Məmmədova bildirib ki, İran keçmiş ABŞ prezidenti Donald Trampın zamanında nüvə silahı anlaşmasından çıxdıqdan sonra təxribat xarakterli addımlarını daha da artırıb.
“İran nüvə silahını daha çox zənginləşdirməyə başlayıb. Bu da bilavasitə İsraili maraqlandıran məsələdir. İsrail hər zaman beynəlxalq aləmdə bunu dilə gətirib. Dövlət rəsmiləri hər zaman bildirib ki, İsrail İran tərəfindən atılan bütün addımlara cavab verməyə hazırdır. Son zamanlarda görürük ki, İsrail-İran münasibətləri həddən artıq gərginləşib. İranın nüvə silahını çoxaltması İsraili qıcıqlandırır. İsrail və ABŞ İranın nüvə silahına qarşı müttəfiqliklərini gücləndirir. İran öz daxilində genişmiqyaslı çaxnaşmalarla üz-üzədir".
"Son hadisələr və təhdid təşkil etdiyi dövlətlərin reaksiyası onu göstərir ki, İran artıq özünə qəbir qazır”.
Politoloq qeyd edib ki, İran tək İsrail və ABŞ-la deyil, öz şimal qonşusu olan Azərbaycana qarşı da təxribatlar törətməklə münasibətlərini gərginləşdirir.
“Fazil Mustafaya qarşı sui-qəsd, ölkədə İran casuslarının tutulması və diplomatlarının ölkədən çıxarılması, daha əvvəl baş verən silahlı insidentlər bu dövlətin nə dərəcədə azğınlaşdığını göstərir. Azərbaycana qarşı törətdiyi təxribatlar İranın ziyanına işləyir. Çünki Azərbaycan və İsrail hərbi sahədə yaxın tərəfdaşdır, 44 günlük müharibə bunu bir daha sübut etdi. Bugünkü gündə İran Azərbaycanın İsrailə dəstək verməsindən çəkinir və bizi hədələməyə çalışır, ölkəni İrana birləşdirməklə təhdid edir. Özü üçün açdığı düşmən cəbhəsi gec-tez İranın bəlasına çevriləcək. İranın gəlib çıxacağı ən son nöqtə odur ki, hədələdiyi bütün dövlətlər ona qarşı birləşəcək və molla rejimi tamamilə devriləcək. Ya İranda sivil dünyəvi dövlət qurulacaq, ya da o, birdəfəlik yox olacaq. İranın buna cavab olaraq bir neçə istiqamətdə müharibə aparması mümkün deyil, düzdür, nəzərə almaq lazımdır ki, İran çox güclü dövlətdir. İranın ən son edə biləcəyi şey nüvə silahından istifadə etməsi ola bilər. Amma mənə elə gəlir ki, belə bir şey baş verməyəcək, İran o nöqtəyə qədər gedib çata bilməyəcək”.
Törə Zeynallı