Avropa İttifaqı (Aİ) Şurasının Şərqi Avropa və Mərkəzi Asiya üzrə İşçi Qrupu(COEST) Azərbaycanda səfərdədir.
29-31 may tarixlərini əhatə edən səfər zamanı beynəlxalq nümayəndələr Şuşa istisna olmaqla işğaldan azad olunan digər şəhərlərdə erməni vandalizmi ilə tanış olub, dağıntılar barədə məlumatlandırılıb.
Avropa İttifaqı (Aİ) Şurası nümayəndələrinin Azərbaycanın işğaldan azad edilmiş bölgələrinə səfərinə münasibət bildirən hüquqşünas, Daxili İşlər Nazirliyi yanında İctimai Şuranın sədri Əliməmməd Nuriyev Ednews-a açıqlamasında bildirib ki, sözügedən səfər beynəlxalq ədalətin bərpa olunmasında həlledici rol oynaya bilər:
“Avropa İttifaqı Şurasının Azərbaycana səfəri mühüm əhəmiyyət kəsb edir. Bir çox hallarda Avropa Parlamentinin Qarabağla bağlı məsələlərdə qəbul etdiyi qərarlar əsassız və qərəzli olur. Bu qərarlarda Erməni lobbisinin izini görürük. Beynəlxalq qurumların işçi qrupları gəlib yerində faktaraşdırıcı missiya ilə məşğul olmaq əvəzinə birtərəfli mövqe əks etdirən qərarlar qəbul edirlər. Aİ Şurasının işğaldan azad edilmiş ərazilərimizə səfəri müəyyən qədər Avropa İttiqafı strukturlarına təsir göstərək. Çünki gəlib yerindəcə həqiqəti görəcəklər. Görəcəklər ki, Azərbaycanın şəhərləri darmadağın edilib, az qala yer üzündən silinib, mədəniyyətimizə, abidələrimizə qarşı geniş miqyasda vandalizm aktı törədilib. Yerindəcə vəziyyətə şahid olan hansısa beynəlxalq qurum bu faktları inkar edə bilməz”.
Ə.Nuriyev onu da qeyd edib ki, Qarabağa davam etməkdə olan səfər ermənilərə qarşı qaldırılan təzminat davası ilə bağlı məsələndə həlledici rol oynaya bilər:
“Təzminat məsələsi hər zaman gündəmdədir. Azərbaycan iqtisadiyyatına, mədəniyyətinə, ekoloji mühitə, milli dəyərlərimizə, tariximizə ziyan dəyib 30 il ərzində. Törədilən vəhşiliklərin hamısı Aİ Şurası işçi qrupunun nəzərinə çatdırılmalı, onlar öz hesabatında bunları qeyd etməlidirlər. Belə səfərlərin hesabatları gələcəkdə məhkəmədə fakt rolunda istifadə edilə bilər”.
Törə Zeynal
